Zëvendëssekretari i NATO-s për vizitë në Kosovë, takon Osmanin e Rakiqin

Angazhimin e NATO-s për sigurinë në Ballkan, në kohën kur në Evropë po zhvillohet luftë, e ka garantuar zëvendëssekretari i përgjithshëm i kësaj aleance ushtarake, Mircea Geoana.

Geoana ishte në krye të delegacionit të Këshillit të Atlantikut të Veriut që vizitoi Kosovën.

Zyrtarët e Aleancës Veriatlantike u takuan me komandantin e KFOR-it, Ferenc Kajari, me drejtorin e Ekipit Këshillues dhe Ndërlidhës të NATO-s në Kosovë, Joachim Hoppe, si dhe me shefat e misionit të EULEX-it, OSBE-së dhe UNMIK-ut.

Pas vizitës në Kosovë, nëpërmjet një njoftimi për media, u tha se për NATO-n, dialogu Kosovë-Serbi është rruga e vetme drejt paqes së qëndrueshme.

“Z. Geoana theksoi se NATO e mbështet plotësisht procesin e normalizimit ndërmjet Beogradit dhe Prishtinës, pasi dialogu Beograd-Prishtinë i lehtësuar nga BE-ja është platforma e vetme për të gjetur një zgjidhje që respekton të drejtat e të gjitha komuniteteve dhe mund të çojë në një paqe të qëndrueshme. Ai shtoi se pushtimi brutal i Ukrainës nga Rusia ka ndryshuar rrënjësisht arkitekturën e sigurisë evropiane dhe NATO mbetet fuqimisht e përkushtuar për një mjedis të sigurt dhe për stabilitet më të gjerë në Ballkanin Perëndimor”, thuhet në njoftimin e Aleancës veri-atlantike.

Nga krerët institucionalë, zëvendëssekretari i përgjithshëm i NATO-s takoi vetëm presidenten Vjosa Osmani.

Takimi ishte e mbyllur për media, e pas tij nuk pati konferencë.

Zyrtari i lartë i NATO-s nuk u takua me kryeministrin Albin Kurti. Në Zyrën e Kryeministrit thanë se arsye është që kreu i Qeverisë nuk gjendet në Kosovë.

“Zyra e Kryeministrit është njoftuar për vizitën e zëvendëssekretarit të NATO-s në Kosovë dhe ka qenë në komunikim për mundësinë e aranzhimit të takimit me kryeministrin e Republikës së Kosovës, Albin Kurti. Por, meqë data e vizitës përkon me vizitën e kryeministrit Kurti në Greqi, nuk ka qenë e mundur të realizohej takimi. Siç jeni të njoftuar, kryeministri i Republikës së Kosovës po merr pjesë në Tryezën vjetore të 26-të të ‘The Economist’ në Athinë, ku po zhvillon takime zyrtare me përfaqësues të ndryshëm”, ka thënë Rozafa Kelmendi, zëdhënëse në Qeverinë e Kosovës.

Nga ministrat e Qeverisë Kurti, zëvendëssekretari Mirça Gjoana takoi vetëm Goran Rakiqin, e që njëherësh është edhe kryetar i Listës Serbe.

Televizioni ka provuar të marrë një qëndrim nga Ministria e Mbrojtjes lidhur me vizitën e zyrtarit të NATO-s e arsyet që nuk pati takim me ministrin Armend Mehaj, por nuk ka marrë përgjigje.