Shkarkimi i ministres Hajdari ndër pikat që do t’i shqyrtojë Kuvendi këtë javë

Shkarkimi i ministres së Tregtisë dhe Industrisë, Rozeta Hajdari e vendimi i Qeverisë për masat emergjente, janë në mesin e një varg raportesh e projektligjesh që do të shqyrtohen këtë javë në Kuvendin e Kosovës. Organizimin e shqyrtimit të tyre në dy seanca të ndara, ka qenë puna që të hënën kanë bërë anëtarët e kryesisë së Kuvendit.

Kuvendi i Kosovës do të mblidhet për dy ditë radhazi këtë javë, të mërkurën dhe të enjten.

Në mbledhjen e kryesisë është vendosur për kohën dhe çështjet që do të shqyrtohen.

Shefat e dy grupeve parlamentare, Mimoza-Kusari-Lila e Vetëvendosjes dhe Abelard Tahiri i PDK-së, shtjelluan disa prej tyre.

Të mërkurën do të shqyrtohen pikat e mbetura nga seancat e kaluara, derisa të enjten një varg raportesh e projektligjesh të reja.

“Shtesë do të trajtohet vendimi i qeverisë për masat emergjente në sektorin e energjisë. Gjithashtu do të trajtohet vendimi i komisionit funksional për ekonomi për shkarkimin e Bordit të Komisionit të Pavarur të Minierave dhe Mineraleve”, ka theksuar Kusari-Lila

Ndërsa Tahiri ka thënë se në Kuvend do të trajtojnë edhe gjendjen në Ministrinë e Industrisë.

“Do të jemi një pikë të propozuar nga PDK-ja e cila do të trajtojë gjendjen mjaft të rëndë në kuadër të Ministrisë së Industrisë, Ndërmarrësisë dhe Tregtisë. Një mori skandalesh që kanë ndodhur për dy vjet, dënimi për mosdeklarimin e pasurisë së ministres. Ne kemi propozuar një rezolutë që kërkon shkarkimin e ministres nga kjo pozitë”, ka deklaruar Tahiri.

Shefi i deputetëve të PDK-së paralajmëroi se do të bëjnë kallëzim penal për drejtues të institucioneve në kuadër të sistemit energjetik, pas gjetjeve të komisionit hetimor parlamentar.