Policia shtiu me armë në drejtim të një veture në Bistricë, thotë se u sulmua

Në paraditen e së hënës pati shkrepje të armëve në Bistricë të Leposaviqit.

Sipas njoftimit të Policisë, vetura me pasagjerë serbë gjatë lëvizjes ka goditur automjetin e Policisë, duke rrezikuar drejtpërdrejt jetën e zyrtarëve policorë.

Në njoftim, po ashtu, thuhet se të dyshuarit kanë arritur të largohen nga vendi i ngjarjes.

Ministri i Punëve të Brendshme, Xhelal Sveçla, është shprehur i brengosur për incidentin.

“Të brengosur thellë për incidentin e fundit në Leposaviq. Dy persona me veturë tentuan t’i shmangen postbllokut policor. Ata kanë goditur me dashje veturën e Policisë së Kosovës dhe kanë vënë në rrezik jetën e policëve. Policët e PK-së janë detyruar të qëllojnë në drejtim të automjetit për të neutralizuar situatën”, ka shkruar Sveçla në Twitter.

Drejtori i Zyrës për Kosovën në Qeverinë e Serbisë, Petar Petkoviq, incidentin e ka quajtur sulm të policisë ndaj serbëve.

“Deleviq është goditur në pjesën e kraharorit të majtë dhe ka një plagë me armë zjarri me të cilën është transportuar urgjentisht në Spitalin e Kralevës. Bashkëdrejtuesi i tij, Dushan S., fatmirësisht nuk ka mbetur i lënduar, ndërsa e gjithë vetura ka qenë e qëlluar”, ka shkruar Petkoviq.

Edhe Arbëri 23 jan 2023 Sveçla reagon për incidentin në Leposaviq, thotë se policëve iu rrezikua jeta

Sipas mediave serbe, personi që pretendohet se është plagosur është dërguar për trajtim në Kralevë.

“Lëndimi trupor është i rëndë, por pacienti nuk është në rrezik për jetën. Shpresojmë se do të shërohet së shpejti”, tha Zoran Mërviq, drejtor i Spitalit të Kralevës.

Për rastin e ndodhur në Leposaviq ka reaguar edhe Lista Serbe. Kjo parti ka akuzuar Policinë e Kosovës se ka qëlluar me qëllimin për t’i vrarë personat që ishin brenda veturës.