-
Nga:
Vlerë Mehmeti
- 3 prill 2024 21:09
- Shpërndaje në:
Komisioni Qendror i Zgjedhjeve të mërkurën ka miratuar formulimin e pyetjes që do të jetë në fletëvotimin e 21 prillit, kur do të votohet për shkarkim të kryetarëve në komunat veriore. Në mbledhjen e së mërkurës është miratuar edhe zgjatja për dy ditë e afatit për aplikim të votuesve jashtë vendit
Kur qytetarët e katër komunave veriore do t’iu drejtohen kutive të votimit më 21 prill, para tyre do të kenë një fletëvotim me pyetjen nëse pajtohen ta shkarkojnë kryetarin e komunës përkatëse.
Si alternativa do të jenë përgjigjet PO dhe JO.
Ky është propozimi që është miratuar të mërkurën në mbledhjen e Komisionit Qendror të Zgjedhjeve.
Arianit Elshani, anëtar i KQZ-së nga PDK-ja, lexoi propozimet edhe të dy formulimeve të tjera të pyetjes për shkarkimin e kryetarëve në Mitrovicë të Veriut, Leposaviq, Zubin-Potok e Zveçan.
“E para është, a jeni për largimin e Lulzim Hetemit nga funksioni i kryetarit të Komunës së Leposaviqit. Një shembull. Një propozim. E dyta, a duhet të largohet nga funksioni kryetari i Komunës së Leposaviqit dhe a pajtoheni që shembull Lulëzim Hetemi të largohet nga funksioni i kryetarit të Komunës së Leposaviqit. Pra, këta janë shembujt që janë dhënë”, ka thënë Elshani.
Bashkë me fletëvotimin, KQZ-ja të mërkurën ka miratuar edhe planin operacional të sigurisë për procesin e votimit të 21 prillit.
Për shkak se deri të mërkurën u regjistruan vetëm dy persona, KQZ-ja po ashtu vendosi të vazhdojë afatin e aplikimit për votuesit jashtë vendit, që nisi të rrjedhë më 29 mars.
Pas një diskutimi nëse e pengon planin operacional, kjo pikë doli në votim.
“Koha për aplikim të votuesve jashtë vendit është zgjatur edhe për dy ditë deri më 5 prill”, ka thënë kryetari i KQZ-së, Kreshnik Radoniqi.
Procesi i votimit për largimin e kryetarëve të katër komunave veriore është mundësuar nëpërmjet Udhëzimit Administrativ të Ministrisë së Administrimit të Pushtetit Lokal.
Fillimisht ai u iniciua me peticione në secilën komunë, e do të pasojë me votim për shkarkim më 21 prill. Nëse edhe ky proces kalon, atëherë faza e fundit janë zgjedhjet e reja komunale.
