Beteja e Koshares – momenti më krenar në historinë e re të Kosovës

Janë bërë 23 vjet qëkur nisi operacioni “Shigjeta” i Brigadës 138 të UÇK-së të udhëhequr nga komandanti Agim Ramadani, në Koshare. Udhëheqësit institucionalë e partiakë e cilësuan betejën si njërin prej momenteve të krenarisë më të madhe në historinë e Kosovës që bëri kthesë në luftën për pavarësi

Si një prej momenteve të krenarisë më të madhe të historisë së Kosovës, është vlerësuar të shtunën beteja e Koshares, në 23-vjetorin e saj. Liderë institucionalë dhe partiakë e shënuan këtë betejë me vendosje kurorash me lule në memorialin e dëshmorëve, si dhe me postime e shkrime në rrjetet sociale.

Presidentja Vjosa Osmani, pasi ka vendosur lule në memorialin e dëshmorëve në Koshare, e ka lartësuar betejën si njërën prej më të lavdishmeve.

“9 prilli është ditë e veçantë në historinë e Republikës së Kosovës. E shënon luftën frontale në rajonin e gjerë të brezit kufitar të Koshares, me qëllim të dëbimit të forcave pushtuese serbe nga zona e kufirit shqiptaro-shqiptar dhe me qëllim të çlirimit të vendit tonë. Kjo ishte ndër betejat më të lavdishme të kryera nga Ushtria Çlirimtare e Kosovës”, ka thënë Osmani.

Si ngjarje historike dhe të rëndësishme për luftën çlirimtare të Kosovës e kanë vlerësuar betejën liderët e partive opozitare.

Kryetari i Lidhjes Demokratike të Kosovës, Lumir Abdixhiku, ka thënë se nga Kosharja iu shtua motivi ushtarëve të UÇK-së.

“23 vjet më parë, burrat dhe gratë më të mirët e vendit nisën betejën e thyerjes së kufirit shqiptar, dhe kështu edhe atë të lënies së një shenje historike, të rrallë, të papërsëritshme, të betejës së madhe të Koshares. Kjo betejë e lavdishme, e guximshme, përveçse simbolikë e thyerjes së kufirit, ishte dhe motiv triumfi i Ushtrisë Çlirimtare të Kosovës”, ka thënë Abdixhiku.

Duke e kujtuar 9 prillin e 1999-s, kryetari i Aleancës për Ardhmërinë e Kosovës, Ramush Haradinaj, ka thënë se presioni te luftëtarët e Ushtrisë Çlirimtare në pjesë të tjera të Kosovës u ul si rezultat i Koshares.

“Thyerja e kufirit shqiptaro-shqiptar dhe një luftë frontale me forcat serbe, jo vetëm që ka pasur për ne, për të gjitha njësitë e UÇK-së, për rëndësinë e një fronti të ri, por po ashtu e ka pasur edhe një rëndësi të madhe sepse na e ka hequr presionin. Pra, presionin e forcave serbe mbi ne, për shkak se janë detyruar të drejtohen kah ky front”, ka thënë ai.

Nëpërmjet një postimi në Facebook, kryeministri Albin Kurti ka theksuar se në betejën e Koshares, “tytat e shqiptarëve u shndërruan në ferr për ushtrinë serbe”.

“Në historinë e luftërave të ushtrive serbe me shqiptarët, Kosharja është Luma e Dytë (1912), sepse aty, tytat e armëve të ushtarëve të UÇK-së u kthyen në zjarre ferri për ushtarët serbë. Një betejë e tillë integrale dëshmoi se pjesëmarrja e shqiptarëve në çlirimin e tyre kishte mbërritur fazën më të lartë të organizimit”, ka shkruar kryeministri Kurti.

Ai ka rikujtuar se në këtë betejë u përfshinë edhe forcat ajrore të NATO-s dhe ato të ushtrisë së Shqipërisë.

“Në kronologjinë e betejave të UÇK-së, Beteja e Koshares është integrale. Aty, luftëtarë nga të gjitha zonat operative dhe nga të gjitha trevat shqiptare, të ndihmuar nga ushtria e Republikës së Shqipërisë dhe forcat ajrore të NATO-s, luftuan kundër trupave të armatës jugosllave”, ka shkruar kryeministri Kurti në Facebook.

Kosharja është një nga betejat më të rëndësishme për UÇK-në, ku u vranë 144 ushtarë dhe 170 të tjerë u plagosën. Një nga ish-udhëheqësit e këtij aksioni, Rrustem Berisha, e ka përshkruar atë si betejë të unitetit dhe të sakrificës.

“Beteja e Koshares ishte ideuar dhe planifikuar nga ushtarakët e kësaj beteje dhe dolën të sakta të gjitha parashikimet. Kazerma e Koshares u fut në rrethim të plotë dhe të nesërmen me datën 10 prill në orët e pasdites, forcat tona morën kazermën e Koshares dhe të njëjtën ditë u vendos flamuri shqiptar, i cili valoi deri në përfundimin e luftës. Lufta e Koshares ishte e të gjithëve, ishte betejë e unitetit e sakrificës dhe e fitores së madhe ushtarake, politike dhe diplomatike”, ka thënë ai. Kjo betejë, nga e cila përparoi rezistenca e UÇK-së, u zhvillua nga 9 prilli deri më 10 qershor, duke vrarë 108 ushtarë serbë.