Skena e muzikës techno në Berlin, në listën e UNESCO-s

E ngarkuara e Qeverisë gjermane për kulturën, Claudia Roth, e vlerësoi përfshirjen e skenës berlineze të technos si një shenjë të rëndësishme për një koncept të zgjeruar të kulturës, i cili drejtohet kundër “ndarjes absurde” midis kulturës serioze dhe kulturës argëtuese

(Deutsche Welle) – Gjatë viteve 1980, skena e klubeve të Berlinit u zhvillua në një nga bërthamat kryesore të subkulturës techno të asaj kohe në botë. Zhanri i muzikës elektronike u bë një lloj kolone zanore e viteve të ndryshimit pas ribashkimit të Gjermanisë. Si simbole të saj mund të përmenden klubi legjendar “Tresor”, i cili u hap në vitin 1991, si dhe Parada e Dashurisë. Tani, skena e famshme e technos së Berlinit përfshihet në listën e trashëgimisë kulturore jomateriale të UNESCO-s.

Berlini njihet në botë për gjallërinë e klubeve, megjithatë shumë prej tyre po vuajnë ende nga pasojat e pandemisë COVID-19.

E ngarkuara e Qeverisë gjermane për kulturën, Claudia Roth, e vlerësoi përfshirjen e skenës berlineze të technos si një shenjë të rëndësishme për një koncept të zgjeruar të kulturës, i cili drejtohet kundër “ndarjes absurde” midis kulturës serioze dhe kulturës argëtuese.

“Pavarësisht nëse kemi të bëjmë me subkulturë apo teknika tradicionale artizanale, ato të gjitha janë pjesë e pasurisë kulturore të vendit tonë”, ka thënë ajo në Berlin.

Lista e trashëgimisë kulturore jomateriale të UNESCO-s përfshin elemente të tilla si muzika, vallet, performancat, zejet e lashta dhe zakonet e ndryshme si thesare kulturore botërore që duhen mbrojtur.