Rikthehet teknika 170-vjeçare e maestros së fotografisë, Pietro Marubi

Në Muzeun “Marubi” në Shkodër, pas 170 vjetësh është rikthyer teknika fotografike e kolodiumit të lëngshëm, me të cilën Pietro Marubi filloi rrugëtimin e fotografisë shqiptare.

Ka qenë kryeministri i Shqipërisë, Edi Rama, ai që në rrjetet sociale ka ndarë imazhe nga aplikimi i kësaj teknike në Shtëpinë e Fotografisë nëpërmjet asistencës së ekspertëve gjermanë.

Njëri nga ekspertët gjermanë është Maximilian Zeitler, fotograf dhe specialist i realizimit të proceseve historike të fotografisë. Gjatë vizitës në muzeun “Marubi”, Zeitlet ka shikuar nga afër disa prej xham-negativëve të teknikës së kolodiumit të lëngshëm të realizuara nga Pietro Marubi.

“Shkodra e Artit dhe Kulturës ofron një udhëtim mbrapa në kohë përmes fotografisë, me eksperiencën e veçantë të teknikës që përdorej 170 vjet më parë nga i papërsëritshmi Pjetër Marubi dhe pasardhësit e tij gjenialë të dinastisë legjendare të Marubëve”, ka shkruar Rama. “Kjo teknikë e aplikuar sërish në Shtëpinë e Fotografisë përmes asistencës së ekspertëve gjermanë, të cilët e aplikojnë ende metodën e fotove bardhezi të punuara manualisht, risjell në Shkodër nga drejtuesi pasionant i muzeut unikal, ku ruhet thesari i Marubëve, Luçiano Bedeni”.

Pjetër Marubi ishte një italian nga Piacenza, i cili pjesën më të madhe të aktivitetit të tij artistik e zhvilloi në qytetin e Shkodrës.

Me ardhjen në Shqipëri, ai hapi të parën studio fotografike, të cilën e emërtoi “Dritëshkronja”, duke sjellë shqip fjalën fotografi, pra të shkruash me dritë. Studioja u themelua më 1856 e sot mban emrin fototeka kombëtare “Marubi”.

Edhe Kulturë 30 qer 2026 “Marubi” avancon standardet e konservimit të arkivit

Pjetër Marubi përveçse fotograf, ishte edhe skulptor, arkitekt e piktor.

Ai la një trashëgimi të pasur fotografike, e cila përtej vlerave artistike, ka vlera dokumentare e historike që dëshmojnë për periudhën në të cilën ai jetoi e veproi.