“Më mungon shkolla” si paralajmërim për “MuralFest” në Ferizaj

“Më mungon shkolla” është mesazhi që përcjell murali më i ri në Ferizaj.

Ende pa u finalizuar nënkalimi në qendër të këtij qyteti, atij i është shtuar edhe ky punim artistik.

Drejtoresha e festivalit, Lebibe Topalli e ka përfunduar së bashku me kolegët Pranvera Sylejmani e Drilonë Murseli.

Ky punim shpërfaq gjendjen fëmijëve të mbyllur në kohë të pandemisë, raporton KOHA.

Murali vjen si paralajmërim për edicionin e pestë të “MuralFest”, të cilin organizatorët synojnë ta mbajnë në shtator. Edicioni i sivjetmë, që do të bazohet mbi temën “Ndryshimi”, synon të mbledhë artistë vendorë.

Ky mural do të inaugurohet më 1 qershor për Ditën Ndërkombëtare të Fëmijëve.

Për pesë edicione, festivali “MuralFest” me artistë vendorë e ndërkombëtarë ka sjellë murale me tema të ndryshme në qytetin e Ferizajt.