Historia e “Dodonës” nëpërmjet kukullave

Rosak Pastërtori është kukulla më e vjetër e këtij koleksioni. Kukulla është punuar në vitin 1987.

Përmes këtij personazhi, regjisorja Melihate Qena do t’i mësonte shikuesit e vegjël të teatrit “Dodona” se si të kujdesen për ambientin dhe ta mbajnë pastërtinë, transmeton KOHA.

Tani, personazhi i dashur i fëmijëve së bashku me kukullat e tjera të teatrit do ta ketë një hapësirë të veçantë ekspozuese.

Aktorja dhe regjisorja, e cila punon në Teatrin e kukullave tash 34 vjet flet për rëndësinë e arkivimit të mbi 200 kukullave.

Punimi i kukullave ishte proces sfidues për ata që i realizonin shfaqjet për fëmijë.

Qena shpeshherë e kishte pasur të vështirë të gjente mjeshtër për t’i realizuar personazhet që i kishte në mendje.

Ekspozimi dhe arkivimi i koleksionit të kukullave është lajm i mirë për aktoren Roza Berisha-Fejzullahun, e cila është pjesë e “Dodonës” që nga themelimi.

Kukullat që dokumentojnë historinë e teatrit “Dodona” janë ekspozuar në katin e dytë të ndërtesës. Hapësira që është liruar, më herët kishte shërbyer si dhomë leximi.

Drejtori i teatrit “Dodona”, Visar Krusha, thotë se ideja është që në të ardhmen kukullat të ekspozohen edhe për publikun.

Arkivimi i kukullave është një udhëtim nëpër shfaqjet që janë luajtur në skenën e “Dodonës”. Mes tjerash janë ekspozuar kukullat e shfaqjeve: “Pylli është i të gjithëve” “Minuku lozonjar”, “Elefanti kureshtar”, “Qeni që nuk dinte të lehte”, “Kësulëkuqja”, “Borëbardha” e deri te kukullat e shfaqjes “Liza në botën e çudirave”, që e pati premierën në shkurt të këtij viti.