Prishtinë, 4 shkurt – Ministria e Kulturës dhe Biblioteka Kombëtare e Kosovës “Pjetër Bogdani” kanë hedhur hapin parë për ta realizuar punën në terren sa i përket projektit “Kujtesa e Kosovës: Rrëfimet e të mbijetuarve të masakrës së Krushës së Madhe”. Ky projekt ishte paralajmëruar në nëntor të vitit të kaluar. Do të mblidhen rrëfimet e të mbijetuarve të vitit 1999 në fshatin që gjendet në Komunën e Rahovecit. Ministria dhe Biblioteka janë vënë në kërkim të 30 vetave, që do t’i realizojnë intervistat dhe transkriptimin e intervistave për projektin. Për këtë kanë hapur thirrje publike. Planifikohet që të dokumentohet një pjesë e historisë së viteve të luftës së fundit në Kosovë.
Në ditën e 24-t të marsit 1999, forcat serbe do ta rrethonin Krushën e Madhe të Rahovecit. E një ditë më pas në emër të “ndjekjes së terroristëve shqiptarë” do të vriteshin, digjeshin e hidheshin në lum mbi 240 civilë shqiptarë nga Krusha e Madhe dhe Krusha e Vogël. Tash, më shumë se 20 vjet më pas, ende nuk dihet gjë për trupat e pagjetur të mbi 40 personave. Rrëfimet për atë që ka ngjarë në këto vendbanime janë të shumta.
Por, 250 deri në 300 prej tyre do të mblidhen e regjistrohen me video e audio. Këtë do ta bëjnë të mundur projekti i bibliotekës kombëtare të Kosovës, “Pjetër Bogdani”, Ambasada e Shteteve të Bashkuara të Amerikës në Kosovë dhe Departamenti i Antropologjisë i Fakultetit Filozofik. Brenda dy vjetëve punë, planifikohet që të arkivohen si audio e video dhe pos në shqip, të transkriptohen edhe në anglisht e serbisht.
Sipas konkursit të hapur këtë javë, një intervistë do të paguhet 50 euro dhe po aq edhe transkriptimi. Të angazhuarit do të ndjekin të gjitha trajnimet e organizuara në kuadër të projektit, të marrin pjesë në identifikimin e të intervistuarve, të realizojnë intervistat me standarde të larta etike dhe profesionale dhe ta bëjnë transkriptimin në mënyrë autentike dhe të saktë. Kërkohet që konkurrentët të cilët mund t’i dorëzojnë aplikacionet deri më 4 shkurt, të jenë të diplomuar ose në vitin e fundit të studimeve në Fakultetin Filozofik apo në Fakultetin e Filologjisë, dhe të kenë së paku një rekomandim që dëshmon përvojën në këtë fushë.
