Në Galerinë Kombëtare të Kosovës, sot, është mbajtur konferenca në të cilën artisti Sislej Xhafa njoftoi se kësaj galerie i dhuron veprën “Pavijoni Klandestin, 1997”, që është një ndër veprat e tij më të rëndësishme.
Sislej Xhafa, është një nga artistët bashkëkohor më të njohur — ai përfaqësoi Kosovën në Bienalen e Venecias, si dhe prezantoi vitin e kaluar njërën prej ekspozitave më të përfolura.
E, së fundmi ai vendosi këtë vepër t’ia dhurojë Galerisë Kombëtare të Kosovës për ta pasuruar koleksionin e saj që përmban përmbi 900 vepra artistike.
Arta Bunjaku—Agani, drejtoresha e Galerisë Kombëtare, tha në hapje të kësaj konference se ndihet e lumtur për këtë prurje, shkruan KultPlus.
Ajo theksoi bashkëpunimin e mirë që ka Galeria me artistin Xhafa. Tutje, Bunjaku—Agani foli para gazetarëve për veprat që ka në koleksion Galeria.
Edhe
Ajo që nuk shihet
“Artisti Xhafa ka vendosur që njërën nga veprat më të rëndësishme, e sipas kritikëve të artit e cilësuar si më e rëndësishmja e tij, t’ia gjej shtëpinë në Galerinë Kombëtare”, tha ajo.
“Unë kam bashkëpunuar me Sislejn në Galeri dhe në ekspozitën në vitin 2018, mandej në përfaqësimin e Kosovës në Bienalen e 57-të Venedik, ky bashkëpunim ka qenë kthesë e madhe në karrierën time” potencoi Agani—Bunjaku.
Artisti Sislej Xhafa, gjithashtu u shpreh i lumtur që arriti ta pasurojë fondin e Galerisë së Arteve. Ai foli për përvojën e tij si artist, që nga studimet në Firencë, deri te përfaqësimi i Kosovës në Bienale.
Duke folur për ekspozitën e vitit të kaluar, Xhafa, tha se pret që situata të ndryshojë dhe të përmirësohen kushtet e artistëve.
“Këtu jam rritur, këtu kam luajtur si fëmijë dhe me kënaqësi kontribuoj për një institucion si Galeria Kombëtare që më ka përkrahur çdoherë”.
I pyetur për ekspozitën e vitit të kaluar, Xhafa tha se i mori me sportivitet kritikat për ekspozitën.
Edhe
Presheva me Sislej Xhafën synon të futet në hartën botërore të artit bashkëkohor
“Arti është ndjenjë. Natyrisht, mund të pëlqehet ose jo por në thelb, janë ndjenjat që artisti i shpreh. Arti krijon mbresa të paharruara, unë uroj që gradualisht situata e artistëve të përmirësohet, sepse rruga e artsitit është e gjatë dhe shpeshherë e varfër” potencoi ai duke përfunduar, “uroj të vijnë njerëz që do t’ju shërbejnë artistëve dhe t’i përkrahin ata dhe institucionet artistike që të kenë hapësirat dinjitoze për t’i shfaqur krijimet e tyre”.
{gallery}
