Ka nisur ceremonia e hapjes zyrtare të bienales evropiane të artit bashkëkohor “Manifesta 14”. Kjo ngjarje e madhe kulturore për 100 ditë sjell ekspozita e ngjarje të shumta artistike të emrave më të shquar të artit nëpër botë.
Në pllatonë e Pallatit të Rinisë dhe Sportit në mbrëmjen e së premtes, pas performancës nga Astrit Ismajli, të pranishmëve do t’u adresohen krerët e shtetit dhe kryetari i Prishtinës.
“Manifesta si bienale, si aktivitet apo si një organizim i ka bashkuar të gjitha partitë e të gjithë komunitetin. Ka qenë ndjenjë e mirë që të gjithë bashkë me qenë që me e realizu një ngjarje të tillë. Po të mos ishim bashkë, do të ishte problem”, ka thënë koordinatori i eventeve, Adrian Berisha, për KTV-në nga ceremonia e hapjes.
Ai ka bërë të ditur se pas fjalimeve në ceremoni do të performojë një bend që vjen dhuratë nga Komuna e Amsterdamit, e më pas do të vazhdohet nga “Prishtina All Star”, që është kombinim i cili synon të tregojë muzikën që ka mbizotëruar në 40 vjet në Prishtinë.
Autoritetet vendore e lokale kanë thënë se presin shumë nga kjo bienale si nga ngritja e imazhit të Kosovës, po ashtu edhe në aspektin ekonomik.
Qeveria ka përkrahur bienalen me mbi dy milionë euro. Drejtoresha e “Manifestas” është zotuar se do t’i kthejë më shumë se dyfishin e investimeve.
Ka prani të madhe edhe të gazetarëve të huaj.
“Manifesta 14” për 100 ditë do të sjellë shumë aktivitete duke bërë ndërhyrje artistike në 25 lokacione.
© KOHA. Të gjitha të drejtat janë të rezervuara.
