Shoshi: “Europa Nostra” u instrumentalizua nga Serbia që dëshiron të dialogohet për trashëgiminë kulturore
Sali Shoshi, drejtor ekzekutiv i fondacionit kosovar “Trashëgimia Kulturore pa Kufij”, ka thënë se organizata e njohur e trashëgimisë kulturore “Europa Nostra” është instrumentalizuar nga Serbia dhe Kisha Ortodokse Serbe, në momentin kur vendosi ta përfshinte Manastirin e Deçanit në mesin e shtatë monumenteve më të rrezikuara të trashëgimisë në Evropë. Sipas tij, me veprimet e tilla Serbia po mundohet të bëjë që çështja e trashëgimisë kulturore të jetë pjesë e dialogut Kosovë-Serbi.
Në Express Intervistën në KTV, Shoshi ka thënë se asnjë nga argumentet e publikuara nga “Europa Nostra” për Manastirin e Deçanit nuk qëndrojnë. Ai ka deklaruar se në Kosovë nuk ka pasur asnjëherë raportime për përpjekje për sulm terrorist nga ISIS-i e as s’ka telashe me rrugën për Plavë.
“Është komplet instrumentalizimn. Kanë rënë pre e propagandës, si me njerëz brenda organizatës dhe jashtë. Kanë rënë pre e propagandës serbe”, ka thënë ai. “Mendoj që është për keqardhje për një organizatë që ka mbi 50 vjet ekzistencë, që ka rrjet të organizatave nga 40 vende të Evropës, dy nga Kosova. Është për keqardhje që bien pre e propagandës. Mendoj dhe e kam thënë në letër që u jam drejtuar, që qëllimi final i këtij vendimi është që çështja e trashëgimisë të aktualizohet edhe më shumë, të ketë perceptim për problemet në Kosovë dhe të futet në agjendën e bisedimeve në dialog. Kjo ka qenë prapavija prapa që Manastiri i Deçanit të përfshihet në këtë listë”.
Sipas tij, Kosova s’duhet të lejojë që çështja e trashëgimisë të futet në dialog, pasi “Kosova ka bërë shumë më shumë për trashëgiminë kulturore”. Ka propozuar rivendosje të kontakteve me Kishën për të zgjidhur problemet.
Shoshi po ashtu ka thënë se Serbia mundohet që lokalitetet e Kishës Ortodokse Serbe të kenë status eksterritorial në mënyrë që ato zona të mos konsiderohen vlera kulturore të Kosovës.
Ai ka kritikuar ish-Qeverinë për të cilën ka thënë se s’ka reaguar në lidhje me propagandën serbe që Manastiri i Deçanit të shpallet monument i rrezikuar.
Shoshi ka shpjeguar se me Ligjin për Zonat e Veçanta, Kisha Ortodokse Serbe ka autoritet të fuqishëm në Kosovë dhe asnjë vendim s’mund të merret për monumentet brenda këtyre hapësirave që menaxhohen nga kjo kishë. “S’kemi një kler ortodoks që është i rrezikuar, por një që është vendimmarrës për çfarëdo zhvillimi”, ka thënë ai.
Sipas tij, nëse mbahet një takim mes Qeverisë së Kosovës dhe “Europa Nostrës” duhet që të përfshihen të gjitha argumentet sepse “asgjë që është në deklaratën e tyre s’qëndron”.
