Kulturë

Mozaik i veçantë në njëvjetorin e vdekjes së Demaçit

Me rastin e përkujtimit të 1-vjetorit të vdekjes së veprimtarit të çështjes kombëtare Adem Demaçi, Nagip Tashi nga Tërrnoci i Bujanovcit, ka bërë një dedikim të veçantë.

Duke dashur që ta përkujtojë veprimtarin Demaçi, ai ka realizuar mozaikun me portretin e tij, ndërsa e ka punuar me tri lloje të druve: arrë, bagrem dhe çam. Në postimin në rrjetet sociale, Tashi ka theksuar se këtë mozaik e ka punuar brenda tri ditëve, raporton KTV.

Madje, në dedikimin e tij për Adem Demaçin, Tashi shkruan: “Unë tri ditë sakrifikova, nuk dola prej shpisë tu e punu’ mozaikun e figurës së Bacit, m’u dokën sa tri vjet, baca Adem 28 vjet burg, e një jetë sakrificë për lirinë e Kosovës!”

Tashi njihet për punën e tij me lloje të ndryshme të drurit, duke realizuar punime të shumta, veçanërisht portretet e figurave të shquara shqiptare të punuara në mozaikë nga druri. Para pak kohësh, ai ka realizuar mozaikun me portretin e aktorit të njohur shqiptar, Bekim Fehmiu.