Në rastin e rigjykimit për vrasjen e Rr.U, më 13 tetor 2014, në lokalin “Bon Vivant” në Prishtinë, për të cilën vrasje akuzohen Masar Gërdovci dhe Sherif Krasniqi, është vendosur që të dëgjohen edhe një herë të gjithë dëshmitarët.
Fillimisht, në seancën e së premtes, gjykatësi Avni Syla ka kërkuar mendimin e palëve në procedurë lidhur me dëgjimin e të gjithë dëshmitarëve sipas sugjerimit të aktgjykimit të Gjykatës Supreme, raporton “Betimi për Drejtësi”.
Lidhur me këtë, prokurori Armend Hamiti ka thënë që në mënyrë që gjykimi të mos zgjatet, por të zbardhet e vërteta dhe të marrë një aktgjykim përfundimtar dhe pasi që është udhëzim i gjykatës me instancë më të lartë, pajtohet që të ftohen të gjithë dëshmitarët.
Edhe përfaqësuesi i palës së dëmtuar, avokati Armend Krasniqi ka konsideruar se njëherë e përgjithmonë duhet të vërtetohen të gjitha çështjet, andaj ka dhënë pëlqimin që të dëgjohen edhe njëherë të gjithë dëshmitarët.
Në anën tjetër, mbrojtësi i të akuzuarit Masar Gërdovci, avokati Naim Rudari ka thënë se mbetet pranë propozimit edhe në faza të mëhershme që të dëgjohen të gjithë dëshmitarët.
“Meqë tani jemi në gjykim për herën e tretë të kësaj çështjeje, edhe unë vlerësoj dhe besoj se duhet të ftohen së paku të gjithë dëshmitarët e që eventualisht në qoftë se palët do të kishin ndonjë pyetje sqaruese për të njëjtit dhe nuk do të duhej të merreshin në pyetje që nga fillimi. Kështu që, vlerësoj dhe mbes pranë propozimit të mëhershëm që të dëgjohen të gjithë dëshmitarët”, ka thënë avokati Rudari.
Po ashtu, edhe mbrojtësi i të akuzuarit Sherif Krasniqi, avokati Haxhi Millaku është pajtuar me këtë propozim, duke kërkuar nga gjykata që të selektojë dëshmitarët të cilët do të ofrojnë fakte të rëndësishme, të cilat sipas tij do të kontribuonin në vërtetimin e gjendjes faktike dhe veprimet individuale të secilit të akuzuar.
Në këto rrethana, trupi gjykues ka vendosur që pas deklarimit të palëve dhe sugjerimeve të aktgjykimit të Gjykatës Supreme, t’i ftojë edhe një herë të gjithë dëshmitarët për t’u dëgjuar në seancat e radhës të shqyrtimit gjyqësor.
Avokati Millaku ka kërkuar nga gjykata që të mbrojturit të tij t’i zëvendësohet masa e paraburgimit me arrest shtëpiak.
“Janë afër 6 vjet dhe nga shkresat e lëndës rezulton se ka qenë duke u mbrojtur në liri, me korrektësi ka ardhur në seanca, ka respektuar çdo masë të caktuar nga gjykata, ashtu që kërkojmë që t’i zëvendësojë masën e paraburgimit me arrestin shtëpiak me adresën e tij të përhershme”, ka shtuar avokati Millaku.
Trupi gjykues ka refuzuar propozimin e tillë, duke konsideruar se ende ekzistojnë shkaqet ligjore për të cilat është caktuar masa e paraburgimit.
Në këtë seancë kanë munguar dëshmitarët Adrian Berisha dhe Avni Ahmeti, mungesa e të cilëve ka bërë që të mos ketë kushte për vazhdimin e mbajtjes së kësaj seance.
Seancat e radhës për këtë çështje juridike janë caktuar për 19 dhe 29 shtator 2022.
Në seancën e 4 marsit 2022, gati 7 vjet prej ngritjes së aktakuzës për vrasjen e rojës së lokalit “Bon Vivant”, aktakuza ndaj dy të përfshirëve në këtë rast, Masar Gërdovcit dhe Sherif Krasniqit, është ndryshuar. Sipas prokurorit Armend Hamiti, nuk është Sherif Krasniqi ai që ka privuar nga jeta Rr.U, siç përshkruhet në aktakuzën e vitit 2015, por Masar Gërdovci.
Gjykata Themelore në Prishtinë kishte marrë dy herë aktgjykime dënuese, mirëpo këto aktgjykime ishin anuluar nga instancat më të larta të gjyqësorit.
Së fundi, Gjykata Supreme rastin e ka kthyer në rigjykim pasi që sipas kësaj instance të akuzuarit Gërdovci dhe Sherifi, janë shpallur fajtorë për veprime të cilat dallojnë nga ato për çka janë akuzuar.
Gjykata Themelore në Prishtinë kishte vendosur dy herë për këtë rast, fillimisht në vitin 2019, ku kishte shpallur fajtorë për vrasje vetëm të akuzuarin Gërdovci, e më pas në vitin 2020 ku kishte shpallur fajtorë dy të akuzuarit për vrasje në bashkëkryerje.
Gërdovci e Krasniqi akuzohen se më 13 tetor 2014 në lokalin “Bon Vivant” në qendër të Prishtinës kishin vrarë rojën e lokalit pasi ua kërkoi largimin nga lokali, pas kërkesës së menaxherit të lokalit./BetimipërDrejtësi