Tre turistë të huaj shpëtohen nga policia, nxirren nga shkëmbinjtë në Himarë

Tre turistë të huaj janë shpëtuar nga Policia e Shqipërisë të shtunën, pasi ishin bllokuar në zonën e plazhit të Akuariumit në Himarë.

Siç është njoftuar nga autoritetet, tre turistët ishin bllokuar në një zonë shkëmbore.

Të tre janë në gjendje të mirë shëndetësore.

“Krahas detyrës për garantimin e rendit dhe sigurisë publike, shërbimet e Policisë mbeten të angazhuara edhe për të ndërhyrë dhe për t’iu ardhur në ndihmë çdo qytetari apo turisti në raste emergjente. Mbrëmjen e sotme, patrulla e rendit me shërbim në zonën e Jalës, pas një njoftimi se tre turistë të huaj kishin mbetur të bllokuar në një zonë të thepisur shkëmbore, në plazhin e Akuariumit, ndërhyri duke shkuar menjëherë në vendin ku kërkohej ndihmë. Pas kërkimeve në terren, u bë e mundur lokalizimi i tre turistëve të huaj, të cilët u nxorën prej shkëmbinjve ku kishin mbetur të bllokuar. Aktualisht, të tre ndodhen në gjendje të mirë shëndetësore”, thuhet në njoftimin e Policisë.