Policia në Zubin-Potok gjen uniforma, municion dhe pajisje tjera ushtarake

Policia e Kosovës ka njoftuar se në Zubin-Potok ka gjetur uniforma, municion dhe pajisje ushtarake.
Ato janë gjetur në një lokacion ku Policia ka shkuar ta kërkojë një të dyshuar për në lidhje me rastin e laboratorit të drogës në fshatin Qukiq të Zubin-Potokut i cili ishte hetuar në vitin 2018.

Me datën 20.11.2024 rreth orës 12:00 njësia e Drejtorisë për Hetimin e Trafikimit të Narkotikeve - Mitrovicë Veri në koordinim me njësitë policore Mitrovicë Veri me autorizim të Prokurorit nga Prokuroria Themelore Mitrovicë në fshatin Drobnjak Komuna Zubin-Potok ka kërkuar të dyshuarin me iniciale ( S.M.) si person në kërkim në lidhje me rastin e laboratorit të drogës në fshatin Qukiq të Zubin-Potokut i cili rast ishte hetuar në vitin 2018”, thuhet në njoftim. 

I dyshuari thuhet se nuk është gjetur në lokacionin ku dyshohej se mund të jetë, mirëpo në pronën e tij, në një mal, në një vend të mbuluara me dhe janë gjetur uniforma dhe pajisje tjera ushtarake.

“Në vendin e ngjarjes është thirrur njësia e specializuar respektivisht njësia për trajtimin e mjeteve eksplozive, ku gjatë kontrollit edhe në 3 (tri) vende tjera të groposura janë gjetur dhe sekuestruar pajisje të ngjashme. Dëshmitë të cilat janë gjetur dhe janë marrë nga Policia janë: Uniformë ushtarake, pjesë të pushkëve të gjata, jelek taktik, gas maska, një tytë e pistoletës, një palë pranga dhe 1471 fishekë të kalibrave të ndryshëm”, thuhet në njoftim.