Katër aksidente komunikacioni me të lënduar në rajonin e Prishtinës

Policia e Kosovës, në raportin e saj 24 orësh, ka bërë me dije se vetëm në rajonin e Prishtinës janë regjistruar katër aksidente komunikacioni me të lënduar.

Në rrugën “Fehmi Agani” në Prishtinë, dje në orën 14:40, raportohet se i dyshuari mashkull, shqiptar i Kosovës, përderisa ishte duke lëvizur me veturën Mercedes, në rrethana të panjohura ka goditur këmbësorin-viktimën mashkull, po ashtu shqiptar i Kosovës.

Viktima ka pësuar lëndime trupore dhe i njëjti është dërguar për tretman mjekësor në QKUK-Prishtinë, ndërsa nuk raportohet për të arrestuar.

Kurse në fshatin Gllamnik, Komuna e Podujevës, po dje në ora 8:25, raportohet se i dyshuari mashkull, shqiptar i Kosovës, derisa ishte duke drejtuar veturën VW Passat, nga pakujdesia dhe mospërshtatja e shpejtësisë së lëvizjes me kushtet e rrugës, ka goditur një biçikletë që drejtohej nga viktima mashkull, gjithashtu shqiptar i Kosovës, raporton Koha.net.

Si pasojë e aksidentit, viktima ka pësuar lëndime trupore dhe është dërguar në QKUK-Prishtinë për tretman mjekësor.

Ndërkaq në lagjen Veternik të kryeqytetit, dje në ora 21:15, raportohet se ka ndodhur aksident në mes të dy veturave, një BMW që drejtohej nga një mashkull shqiptar, shtetas suedez, dhe një veture Opel Vectra me ngasës mashkull, shqiptar i Kosovës.

Si pasojë e aksidentit, dy pasagjerë, viktimat një mashkull shqiptar me shtetësi suedeze dhe një femër shqiptare e Kosovës, kanë pësuar lëndime trupore dhe janë dërguar në QKUK-Prishtinë për tretman mjekësor.

Dhe rasti i fundit raportohet të ketë ndodhur në fshatin Babush, Komuna e Lipjanit, në ora 17:37.

Policia ka marrë informatën se ka ndodhur aksident në mes të dy veturave, një traktori dhe një kombaji.

Si pasojë e aksidentit, dy viktima meshkuj, shqiptarë të Kosovës, kanë pësuar lëndime trupore dhe janë dërguar në QKUK-Prishtinë për tretman mjekësor.

Lidhur me rastin është njoftuar prokurori, ndërsa nuk raportohet për të arrestuar.