Gjashtë raste të dhunës në familje, viktimë edhe një 6-vjeçare

Gjashtë raste të dhunës në familje janë regjistruar në raportin 24 orësh të Policisë së Kosovës.

Në Prishtinë të premten janë intervistuar dy vëllezër, njëri i mitur, të cilët pas një mosmarrëveshje janë përleshur fizikisht. Si pasojë e rrahjes i mituri ka marrë tretman mjekësor. Pas trajtimit të rastit me rekomandim të prokurorit rasti është trajtuar në procedurë të rregullt.

Po ashtu në kryeqytet të shtunën është arrestuar e dyshuara për shkak se dyshohet se ka tentuar ta godas bashkëshortin e saj. Po ashtu raportohet se ia ka mbyllur edhe derën e hyrjes së banesës. Sipas viktimës, bashkëshortja e tij ka probleme shëndetësore. Me urdhër të prokurorit pas intervistimit e dyshuara është liruar në procedurë të rregullt.

Në Podujevë është arrestuar një burrë nën dyshimin se i njëjti kishte ushtuar dhunë fizike ndaj  bashkëshortes dhe vajzës së tij 6-vjeçare. Si pasojë e dhunës viktimat kanë pranuar tretman mjekësor, kurse i dyshuari pas intervistimit me urdhër të prokurorit është liruar në procedurë të rregullt.

Në Gjilan është arrestuar një burrë nën dyshimin se i njëjti kishte ushtruar dhunë psikike dhe fizike ndaj nënës dhe motrës së tij. Sipas viktimave i dyshuari është recidivist i rasteve të dhunës në familje pasi është përdorues i narkotikëve dhe shumicën e kohës është i dehur. Me vendim të prokurorit, i dyshuari është dërguar në mbajtje për 48 orë.

Në Kaçanik është arrestuar një burrë pasi ka ushtruar dhunë fizike ndaj bashkëshortes. Lidhur me rasti ende nuk është intervistuar i dyshuari. Rasti nën hetime.

Në Klinë një person i gjinisë mashkullore është arrestuar pasi i njëjti në gjendje të dehur ka shkaktuar dhunë në anëtarët e familjes. Një nga anëtarët e familjes ka marrë tretman mjekësor, ndërsa i dyshuari i cili dyshohet se ka ushtruar dhunë në familje edhe më herët, me vendim të prokurorit është dërguar në mbajtje.