Dy të vrarë e 6 të plagosur me armë, për më pak se dy muaj

Dy vrasje e gjashtë plagosje janë raportuar këtë vit. Njohësi i sigurisë, Arben Dashevci, i cilëson të larta këto shifra dhe ato të viteve paraprake. Këtë ai e ndërlidh me numrin e lartë të armëve pa leje që ndodhen në duart e qytetarëve. E për parandalimin e rasteve, psikologu, Naim Telaku, shtron nevojën për investime tek organet e drejtësisë dhe të rendit

Që nga fillimi i këtij viti, bazuar në të dhënat që Policia i prezanton në raportet e saj 24-orëshe për media, në Kosovë janë evidentuar dy raste të vrasjeve dhe 6 të plagosjeve me armë zjarri.

Rasti i fundit i plagosjes ka ndodhur në mbrëmjen e së premtes në Prishtinë.

Sipas policisë, dyshimet janë që një taksist ka marrë plagë nga dy persona, të cilët më pas kanë ikur nga vendi i ngjarjes.

“Raportohet se viktima mashkull kosovar, është gjetur i plagosur nga arma e zjarrit. Viktima është dërguar në QKUK. Sipas dëshmitarëve, të dyshuar janë dy persona të panjohur, të cilët kanë ikur nga vendi i ngjarjes”, thuhet në raportin e Policisë.

Bazuar në të dhënave zyrtare që KOHA i siguroi nga Policia, gjatë vitit 2024 në gjithë Kosovën janë evidentuar 17 raste të vrasjes, që janë 12 më pak se sa një vit më parë, kur u patën raportuan 29.

Eksperti i sigurisë, Arben Dashevci, e cilëson të lartë këtë numër të vrasjeve dhe të plagosjeve, teksa shtimin e rasteve e ndërlidh me armët e shumta pa leje, që qytetarë të Kosovës i mbajnë në duart e tyre.

“Kanë mbetur shumë armë pa leje në duart e qytetarëve të Republikës së Kosovës, ku sipas disa statistikave janë përmbi 300 mijë armë që nuk duhej të ishte kështu. Masat ndëshkimore është koha e fundit që të ndryshohet më. Masa ndëshkimore ose politika ndëshkimore, sanksionet penale, është kohë e fundit që të ndryshohen gjithmonë me termin preventivë për parandalim”, ka thënë Dashevci.

Sipas Policisë, gjatë vitit shkuar janë konfiskuar 6 mijë e 980 armë pa leje. Kjo shifër është për më se pesëfish më e lartë sesa në vitin 2023, kur nga duart e qytetarëve u patën sekuestruar 1 mijë 286 armë zjarri.

Shqetësim për këtë dhe dënimet e buta që gjykatat i shqiptojnë për armëmbajtje pa leje shprehur një ditë më parë në Institutin e Kosovës për Drejtësi (IKD).

Gjatë prezantimit të raportit: “Dënimet me gjobë – leje për armëmbajtje”, hulumtues të IKD-së bënë të ditur se në tre vjetët e fundit, nga 147 rastet gjyqësore lidhur me armëmbajtjet pa leje janë shqiptuar 28 dënime me gjobë, 18 me kusht dhe vetëm një me burgim.

E psikologu Naim Telaku, e shtron nevojën për investime te organet e drejtësisë me qëllim të parandalimit të këtyre rasteve.

“Duhet të merren seriozisht investimet në organet e drejtësisë dhe organet e rendit që të rritet besimi te këto organe. Duhet të punohet një lloj depolarizimi social dhe politik që e kemi në vend”, ka thënë Telaku.

Ai i ka numëruar disa faktorë që çojnë drejt vrasjeve.

Edhe Arbëri 26 jan 2025 Mbi 200 mijë armë pa leje, kërkohet strategji afatgjate për sekuestrimin e tyre

“Ndër faktorët që rrisin gjasën për të ndodhur vrasjet janë pabarazia ekonomike, pabarazia sociale, pasi kemi shtresa shumë të pasura dhe shumë të varfra, mosbesimi në organet e drejtësisë e të rendit”, ka thënë Telaku.

Një hulumtim i organizatës ndërkombëtare “Small Arms Survey”, i kryer më 2018 e që është ndër më të fundit të kësaj natyre, tregoi se rreth 436,000 armë gjenden në duart e qytetarëve, e prej të cilave afro 392,794 janë pa leje.