Dorëzohet në polici personi që vrau qenin në Kaçanik

Një person është dorëzuar në stacionin policor në Kaçanik, pasi ka pranuar se me armë zjarri ka vrarë një qen.

Ndaj tij është iniciuar rast për tri vepra penale: armëmbajtje pa leje, përdorim i armës dhe keqtrajtim i kafshëve.

Siç ka njoftuar Policia, në mesditë një qytetar në fshatin Doganaj kishte raportuar se qeni i tij është qëlluar nga R.S. dhe si pasojë kafsha ka ngordhur.

Policia në vendin e ngjarjes ka kryer ekzaminimet dhe ka konfiskuar tri gëzhoja të pistoletës së përdorur në rast.

I dyshuari më pas është dorëzuar në stacion dhe e ka dorëzuar armën e zjarrit dhe nëntë fishekë.

Pas intervistimit nga prokurori, i dyshuari është liruar në procedurë të rregullt.