Arrestohet një prej të dyshuarve për grabitje në një bankë në rrugën “Bill Klinton” në Prishtinë

Policia e Kosovës ka arrestuar një person i cili më 8 shkurt të këtij viti dyshohet se ka qenë i përfshirë në grabitjen e armatosur që është kryer në një institucion financiar në rrugën “Bill Klinton” në Prishtinë.

Sipas njoftimit të Policisë, arrestimi u krye në lagjen Emshir, në Prishtinë, përderisa policët e përfshirë në operacion pas një observimi paraprak ndaluan personin: D.T, mashkull, 33vjeç, shtetas i Republikës së Kosovës, të cilit i është gjetur dhe sekuestruar një revole.

Policia ka kryer një operacion bastisjeje dhe ka ushtruar kontroll të detajuar në një banesë ku jetonte i dyshuari ku ka arritur të gjejë dhe të sekuestroj: një revole tjetër si dhe gjësende të tjera të cilat nga hetimet e kryera nga ana e policisë dyshohet të jenë përdorur në rastet që janë në hetim.

Ndaj personit të dyshuar për të cilin është ngritur dyshimi i arsyeshëm se është i përfshirë edhe në disa raste të grabitjeve me rekomandimin e prokurorit të shtetit është shqiptuar masa e arrestit policor prej 48 orësh, përderisa po kryhen veprimet vijuese hetimore në procedim të mëtejmë të rastit.