Arrestohen katër punëtorë të poligonit “Dreni” në Prizren për falsifikim dokumentesh

Prokuroria Themelore në Prishtinë ka ndaluar për 48 orë personat me inicialet S.B., R.M., H.N. dhe B.G., të cilët janë të angazhuar si punëtorë-instruktorë të poligonit “Dreni” në Prizren.

Këta të katër dyshohen se kanë kryer veprën penale “Falsifikim i dokumentit zyrtar”, si dhe veprën penale “Rastet e posaçme të falsifikimit të dokumenteve”. 

Sipas njoftimit të Prokurorisë, dyshohet se këto veprime janë kryer në vazhdimësi që ndërlidhen me rastin që është në hetim ndaj zyrtarëve në Ministrinë e Punëve të Brendshme (MPB).

Arrestimi i tyre ka ndodhur pas hulumtimit të zhvilluar nga “Betimit për Drejtësi” me titull “Procesi i kontaminuar i lejeve për armë- Dyshime për korrupsion dhe neglizhencë”, si dhe hetimeve që po zhvillonte Prokuroria Themelore në Prishtinë së bashku me Krimet Ekonomike të Policisë së Kosovës.
Në mesin e personave të arrestuar është dhe një zyrtar policor.

I njëjti bashkë me dy të tjerë janë arrestuar me dyshimet për kryerjen e veprës penale “Falsifikim i dokumentit zyrtar”, ndërsa personi i katërt është arrestuar me dyshimet për kryerjen e veprës penale “Rastet e posaçme të falsifikimit të dokumenteve”.