30 ditë paraburgim dy të miturave që kanosën me thikë një vajzë

Gjykata Themelore në Prizren, Departamenti për të Mitur, ka caktuar masën e paraburgimit në kohëzgjatje pre tridhjetë ditë ndaj të miturave E.J., dhe L.C.

Sipas njoftimit, të miturat E.J., dhe L.C., në bashkëkryerje kanë kryer veprën penale kanosja dhe e mitura E.J., edhe për veprën penale mbajtja në pronësi kontroll ose posedim të paautorizuar të armëve.

Gjykata me rastin e caktimit të masës së paraburgimit ndaj të miturave ka vlerësuar se ekzistojnë arsyet ligjore për caktimin e masës së paraburgimit.

“Se në javën e dytë të muajit Janar 2022, në ambientet e një Shkolle të mesme në Prizren, në bashkëkryerje seriozisht e kanosin personin tjetër me vepra apo gjeste se do t’i shkaktojnë ndonjë të keqe me qëllim të frikësimit ose të shkaktimit të ankthit te personi i tillë, në atë mënyrë që për shkak të një mosmarrëveshjeje të mëparshme mes viktimës – të dëmtuarës, dhe të miturave L.C., dhe E.J., fillimisht e dërgojnë të dëmtuarën prapa shkollës e më pas e kërcënojnë me armës – thikë, (e mitura E.J.,) me anë të një brisku me teh prej 7 cm, kështu të dëmtuarës i shkaktojnë frikë, ankth dhe pasiguri”, thuhet në njoftimin e Gjykatës.

Kurse me datë 25 janar në orët e mesditës, në ambientet e shkollës e mitura E.J., ka mbajtur edhe armë. Policia i gjeti një brisk, me teh prej 7 cm, e cila edhe i është sekuestruar nga ana e policisë.