2 perditesime
09:51

Vrasja në Pejë: Pamje nga vendi i ngjarjes

Është bartur nga policia vetura e djegur, e lidhur me vrasjen e mesnatës së të mërkures në Pejë.

Grupi Koha ka siguruar pamje nga vendi në të cilin është gjetur vetura. Brenda veturës, si është bërë e ditur nga policia, është gjetur një trup i pajetë, i karbonizuar.

Viktima, sipas burimeve të Kohës, dyshohet të jetë Qerim Kelmendi, i vrarë pas mesnate.

Emri i tij është përfolur lidhur me vrasjet e pasluftës në Kosovë.

 

09:08

Vrasja në Pejë: Viktima u gjet e djegur brenda veturës

Policia e Kosovës ka dhënë detaje lidhur me vdekjen e Qerim Kelmendit.

Përmes një raporti, thotë se trupi është gjetur brenda një veture të djegur në fshatin Zahaq të Pejës.

“Gjatë kohës derisa zjarrfikësit ishin duke lokalizuar zjarrin në brendësi të veturës është vërejtur një person (viktimë mashkull) trup i karbonizuar. Vendit të ngjarjes i janë përgjigjur njësitet relevante të sektorit rajonal të hetimeve, njësiti K9, si dhe prokurori i shtetit dhe ekipi mjekësor, të cilët kanë konstatuar vdekjen e viktimës”, thuhet në raportin e policisë.

PK-ja thotë se gjatë shikimit të vendit të ngjarjes është konstatuar se vetura e djegur është e tipit VW Passat me targa vendore.

“Sektori Rajonal i Hetimeve pranë Drejtorisë Rajonale të Policisë në Pejë, në bashkëpunim të plotë me prokurorin e shtetit janë duke u marrë të gjitha veprimet hetimore për të sqaruar rrethanat e këtij rasti të cilësuar ‘vrasje’ dhe janë duke u bërë përpjekje maksimale për të identifikuar kryesin ose kryesit e mundshëm”, përfundon raporti.

Image
08:55

Dyshime se pas mesnate në Pejë është vrarë Qerim Kelmendi

Qerim Kelmendi dyshohet se është vrarë pas mesnate në Pejë, bëjnë të ditura burime të Kohës brenda Policisë së Kosovës.

Koha, ka provuar nga Policia e Kosovës në Pejë të marrë më shumë detaje porse mëngjesin e sotëm kontakti qe i pamundur.

Emri i Kelmendit, është përmendur shumë për vrasjet e pasluftës.