Mbesin të paqarta motivet e vrasjes në Gjilan, bastiset shtëpia e policit

Një vrasje e rëndë ka tronditur Gjilanin këtë të diel.

V.H, pjesëtar i Policisë së Kosovës nga Njësiti për mbrojtje të afërt, dyshohet të ketë vrarë L. Spahiun nga fshati Muqiverc i Kamenicës, jashtë detyrës zyrtare.

Bazuar në hetimet fillestare, dyshohet se V.H. ka shtënë me armë zjarri në drejtim të viktimës, pas një mosmarrëveshjeje lidhur me një aksident që kishte pasur me viktimën, këtu në rrugën “Nato 99” rreth orës 5 të mëngjesit, raporton KTV.

Prokuroria Themelore në Gjilan thotë se motivet e vrasjes ende nuk dihen, derisa ka kërkuar një muaj paraburgim për zyrtarin policor, i cili tashmë është arrestuar dhe suspenduar nga puna.

Familjarët e viktimës në anën tjetër, shprehen se janë të shokuar me rastin, pasi sipas tyre, i ndjeri nuk e njihte policin.

Ata kanë treguar se me viktimën ishte edhe djali i tij 21-vjeçar, i cili edhe i kishte njoftuar për rastin dhe kanë ngritur dyshime se polici mund të ketë qenë në gjendje të dehur.

Inspektorati Policor i Kosovës, gjatë ditës, bashkë me njëstin rajonal të hetimeve kanë bastisur shtëpinë e të dyshuarit në Malishevë të Gjilanit.

IPK-ja ka konfiskuar armën që dyshohet se është përdorur nga i dyshuari në këtë rast dhe një karikator, ndërsa në veturën e tij dy revole të llojit Bereta.

Një familjar i viktimës Lulzim Spahiu, i vrarë mëngjesin e sotëm, i ka rrëfyer Kohës Ditore versionin e tyre të ngjarjes.

Shehad Spahiu ka deklaruar se viktima nuk kishte njohje të mëhershme me policin që kreu vrasjen.

“Në bazë të informatave që kemi, ato informata janë jozyrtare, rasti ka ndodhur shkaku i aksidentit. Me atë polic nuk janë njohur dhe nuk kanë pas probleme. I ndjeri u kon duke shku në Prizren me kamion për me i shit do gjedhe, se në këtë mënyrë ka mbijetu. Në rrugën qarkore të Gjilanit janë aksidentu. Edhe ai polici ka dal ka shti në të ndjerin i cili ka qenë në kamion”, ka thënë Spaihiu.

I ndjeri, në atë moment po shoqërohej edhe nga djali i tij.

“Kurse djali i të ndjerit i cili ka qenë në kamion së bashku me të ka dal nga kamioni dhe ka ikë për me shpëtu. Djali është 20 vjeçar. Kurse i ndjeri 47 vjeçar. Trupi i të ndjerit është në obduksion”, ka thënë ai.

Familja kërkon drejtësi.

“Kërkojmë zbatimin e ligjit sepse njerëzit po vriten dhe askush nuk po mban burg”, ka thënë ai.

Ndërsa familjarët e tjerë të cilët nuk deshën që të prononcohen me emra po e vlerësojnë se familjari i tyre është ekzekutuar nga polici. Ata kërkojnë nga organet e drejtësisë që rasti të procedohet dhe autori të ndëshkohet.

“Për ne është ekzekutim sepse është qëlluar në një distancë shumë të afërt. Ai e ka pas xhamin e kamionit të hapur dhe ka shti tri herë. Nuk i ka dhanë hapësirë por e ka ekzekutuar. Ne kemi marrë kamionin dhe e kemi pa se brenda ka qenë me gjak. Me vra një njeri në atë mënyrë është ekzekutim”, ka thënë njëri prej familjarëve.

Hashani thotë se vrasjes së sotme në Gjilan dyshohet se i parapriu një aksident trafiku

Zëdhënësi i Policisë në rajonin e Gjilanit, Ismet Hashani, ka thënë se dyshohet që vrasjes së një personi në Gjilan nga një polic në mëngjesin e sotëm, i ka paraprirë një aksident trafiku.

Ai në një prononcim për media ka shtuar se për momentin nuk duhen motivet e vrasjes.

“E vërteta është se rasti ka ndodhur në mëngjesin e sotëm, diku rreth orës 5 të mëngjesit. Policia është informuar se ka pas të shtëna me armë zjarri ku është konstatuar se një qytetarë ka mbetur i vdekur nga arma e zjarrit. Për momentin nuk dihen motivet e vrasjes. Krejt çka dihet është se kësaj dyshohet se i ka paraprirë një aksident trafiku, mirëpo nuk kemi detaje të tjera”, ka thënë ai.

Ai nuk ka dhënë detaje për bastisjen në shtëpinë e zyrtarit policor.

Sipas tij, lidhur me rastin janë intervistuar edhe dëshmitarë të tjerë.

Inspektorati Policor i Kosovës përmes një komunikate për media sjell detajet nga vrasja e një qytetari gjatë ditës së sotme në Gjilan nga një pjesëtar i Policisë.

Në komunikatë thuhet se hetuesit e IPK-së kanë vazhduar të ndërmarrin veprime hetimore në koordinim me prokurorin kujdestar në vendin e ngjarjes.

“Bazuar në hetimet preliminare, dyshohet se personi i dyshuar V.H (pjesëtar i Policisë së Kosovës nga Njësiti për mbrojtje të afërt), pas një mosmarrëveshje lidhur me një aksident ka shtënë me armë zjarri në drejtim të viktimës”, thuhet në komunikatë.

IPK-ja konfirmon se me këtë rast nga i dyshuari janë konfiskuar tri armë, transmeton Koha.net.

“Si pjesë e procedurës hetimore IPK ka konfiskuar një armë GLOCK 9x19 që dyshohet se është përdorur nga i dyshuari në këtë rast dhe një karikator. Në veturën e të dyshuarit (zyrtarit policor) janë gjetur dhe konfiskuar edhe dy revole të llojit Bereta”, thotë IPK.

Hetuesit e IPK-së në bashkëpunim me njësitin rajonal të hetimeve kanë zbatuar edhe një urdhëresë për bastisje në fshatin Malishevë të Gjilanit në shtëpinë dhe objektet përcjellëse të të dyshuarit.

Veprimet e mëtutjeshme hetimore lidhur me këtë incident do të vazhdojnë nga hetuesit e IPK-së në konsultim të vazhdueshëm me prokurorin përgjegjës.

Prokuroria Themelore në Gjilan ka njoftuar se polici V.H., i dyshuar për vrasjen e një personi në Gjilan, është ndaluar në kohëzgjatje prej 48 orësh dhe ndaj tij brenda afatit ligjor do të kërkohet masa e paraburgimit, nga Gjykata kompetente në Gjilan.

Në njoftimin dërguar mediave, Prokuroria thotë se sot, më 29 dhjetor 2019, rreth orës 04:50 minuta, në Gjilan, ka ndodhur një vrasje e rëndë, motivet e të cilës ende nuk dihen.

“Ngjarja ka ndodhur në rrugën ‘Nato 99’, në Gjilan, ku dyshohet se pas një aksidenti në komunikacion, i dyshuari V.H., me armë zjarri, ka shtënë në drejtim të viktimës, tani të ndjerit L.S., i cili si pasojë e plagëve të marra ka ndërruar jetë në vendin e ngjarjes”, njofton Prokuroria.

“Pas rastit të ndodhur në vendin e ngjarjes menjëherë kanë dalë prokurori kujdestar, policia dhe ekipi mjekësor, i cili edhe e ka konstatuar vdekjen e tij, ndërsa me urdhër të prokurorit trupi i pajetë i të ndjerit është dërguar në Institutin e Mjekësisë Ligjore, në Prishtinë, për obduksion”, ka njoftuar Prokuroria Themelore e Gjilanit.

Në mëngjesin e sotëm është arrestuar një polic për vrasjen e një personi, konfirmon Policia e Kosovës përmes një komunikate për media.

“Sot rreth orës 05:00 të mëngjesit Policia e Kosovës ka pranuar një informacion së në rrugën “Nato 99”, në Gjilan ka ndodhur një incident me të shtëna me armë zjarri dhe si pasojë e këtij incidenti një person ka vdekur”, thuhet në komunikatë.

Tutje thuhet se dyshimet ishin se në këtë incident i dyshuar ishte një pjesëtar i Policisë së Kosovës, menjëherë përmes “Linjës së kaltër” janë njoftuar hetuesit e IPK-së të cilët kanë dalë në vendin e ngjarjes.

Bazuar në hetimet preliminare dyshohet se personi i dyshuar V. H. pjesëtar i Policisë së Kosovës, jashtë detyrës zyrtare, ka shtënë me armë zjarri në drejtim të viktimës L.S.

Hetuesit e IPK-së së bashku me njësitin e forenzikës dhe njësinë rajonale të hetimeve janë akoma duke bërë këqyrjen e vendit të ngjarjes në vendin ku ka ndodhur incidenti në konsultim edhe me prokurorin kujdestar që është prezent aty.

Trupi i pajetë i viktimës është dërguar në Institutin e Mjekësisë Ligjore në Prishtinë.

Personi i dyshuar në këtë rast – zyrtari policor, është arrestuar nga Inspektorati Policor kurse me vendim të prokurorit të njëjtit i është caktuar masa e ndalimit për 48 orë dhe është suspenduar nga detyra.

Veprimet e mëtutjeshme hetimore lidhur me këtë incident do të vazhdojnë nga hetuesit e IPK-së në konsultim të vazhdueshëm me prokurorin përgjegjës.

© KOHA. Të gjitha të drejtat janë të rezervuara.