Arrest shtëpiak të dyshuarit në Pejë që e dhunoi seksualisht tre ditë një grua, më pas për 50 euro e trafikoi tek një tjetër në Prizren Foto: Ilustrim

Arrest shtëpiak të dyshuarit në Pejë që e dhunoi seksualisht tre ditë një grua, më pas për 50 euro e trafikoi tek një tjetër në Prizren

15 August 2019 14:29

Gjykata Themelore në Pejë – Departamenti për Krime të Rënda, ka caktuar veç arrest shtëpiak prej 1 muaj, ndaj të pandehurit Q.A për shkak të dyshimit të bazuar për trafikim me njerëz.

Gjatë muajve gusht – shtator 2012, siç njofton gjykata, në Banjë, Komuna Istog, në bashkëveprim me persona të tjerë Q.A ka trafikuar viktimën A.S.

“I pandehuri paraprakisht e strehon viktimën në katin e dytë të furrës së tij dhe kryen me viktimën marrëdhënie seksuale pa vullnetin e saj për tre ditë, pastaj e thërret një person tjetër i cili e merr viktimën me automjet dhe për këtë shërbim ia jep 50 euro, e i cili pastaj e dërgon viktimën në Prizren dhe kryen marrëdhënie seksuale pa dëshirën e saj”, thuhet në kumtesë.

Me këto veprime i pandehuri Q.A dyshohet se ka kryer veprën penale trafikim me njerëz.

“Gjykata në këtë çështje juridiko penale, ka caktuar disa herë shqyrtim gjyqësor ku të bashkëpandehurit të tjerë kanë ardhur rregullisht, mirëpo i pandehuri Q.A nuk ka ardhur asnjëherë me arsyetim se i njëjti gjendet në botën e jashtme andaj, gjykata për të njëjtin ka lëshuar urdhëresë për sjelljen e tij në gjykatë, pastaj ka lëshuar letër rreshtim vendor, si dhe letër rreshtim ndërkombëtar, me ç ‘rast me datë 14.08.2019, i njëjti nga pjesëtarët e Stacionit Policor në Pejë është sjellë në gjykatë sipas letër rreshtimit ndërkombëtar dhe ndaj tij është caktuar masa e arrestit shtëpiak në kohëzgjatje prej 1 muaji”, thuhet tutje në njoftim.

Kundër këtij vendimi pala e pakënaqur ka të drejtë ankese në Gjykatën e Apelit.

© KOHA. Të gjitha të drejtat janë të rezervuara.

Komentet

Shto koment

Të ngjashme