2 perditesime
13:12

Familja e mohon se 64-vjeçari në Novosellë vdiq nga tymi

Familja e 64-vjeçarit në Novosellë të Malishevës ka mohuar se i njëjti ka vdekur nga tymi i shkaktuar në stallën e cila ishte përfshirë nga flakët.

Sipas tyre ai ka vdekur nga sulmi në zemër disa pas shpërthimit të zjarrit.

Policia e Kosovës në njoftimin e dërguar ka thënë se viktima dyshohet të ketë vdekur nga tymi.

12:15

Policia jep detaje për vdekjen e 64-vjeçarit në Novosellë

Policia e Kosovës ka dhënë detaje të reja për vdekjen e 64-vjeçarit në Novosellë, i cili dyshohet se vdiq nga tymi i zjarrit që kishte kapluar stallën e tij.

Sipas njoftimit, Policia e Kosovës, Stacioni Policor në Malishevë, rreth orës 02:30 të datës 03.08.2021 është njoftuar nga Qendra e Mjekësisë Familjare (QKMF), se një person i gjinisë mashkullore (viti i lindjes 1957), është dërguar pa shenja jete nga familjarët në këtë institucion shëndetësor.

Policia njofton se njësitet relevante policore (patrulla dhe hetuesia), i janë përgjigjur rastit. Sipas deklaratave të familjarëve, dyshohet se viktima diku rreth orës 01:00 pas mesnate më datë (03.08.2021) ishte zgjuar dhe kishte shkuar tek stalla e tij e cila ishte përfshirë nga zjarri, më 02.08.2021, që të sigurohej nëse zjarri ishte shuar plotësisht apo nëse është riaktivizuar. Familjarët e kishin gjetur viktimën rreth një orë më vonë dhe e kishin dërguar në QKMF.

“Më 02.08.2021 si pasojë e zjarrit ishte djegur një pjesë e stallës së tij, e cila dyshohet të jetë djegur si pasojë e lidhjeve të shkurtra në rrjet elektrik shkaku i erërave të forta. Zjarri ishte shuar nga zjarrfikësit në të njëjtën ditë rreth orës 19:00, pra më datë 02.08.2021. Dyshimet e mjekut kujdestar janë se i njëjti mund të jetë ngulfatur/asfiksuar nga tymi i stallës e cila edhe pse zjarri ishte shuar ende tymonte. Pas konsultimeve me prokurorin e shtetit rasti është kualifikuar si ‘hetim i vdekjes’, për hetim të rastit janë angazhuar hetuesit e Sektorit të Hetimeve Rajonale Gjakovë. Me urdhër të prokurorit trupi i pajetë është dërguar në Institutin e Mjekësisë Ligjore për obduksion”, thuhet në njoftim.

08:27

Vdes një person në Novosellë, dyshohet se shkaktar ishte tymi

Një person në fshatin Novosellë të Malishevës dyshohet se ka vdekur nga ajri i tymosur i një stalle që ishte përfshirë nga zjarri.

Sipas njoftimit, ai është dërguar në Qendrën e Mjekësisë Familjare pa shenja jete, vdekja e së cilit është konstatuar nga ekipi mjekësor.

“Viktima mashkull kosovar është sjellë pa shenja jete në QKMF pa shenja jete. Vdekjen e tij e ka konstatuar ekipi mjekësor. Si pasoje kësaj vdekje dyshohet të jetë ajri i tymosur pasi që viktima kishte shkuar tek stalla e cila ishte përfshirë nga zjarri. Me vendim të prokurorit trupi i pajetë i viktimës është dërguar në IM për obduksion”, thuhet në njoftim.