Dy mësimdhënës u arrestuan të premten mbrëma në fshatin Shkozë të Malishevës nën dyshimin se keqtrajtuan një 12-vjeçar. Babai i 12-vjeçarit i cili është nxënës në të njëjtën shkollë ku dyshohet se u rrah nga mësimdhënësit, ka treguar ngjarjes sipas asaj që i ka thënë i biri për rastin e dyshuar.
S.B. ka thënë se djali i tij ishte ndeshur me mësimdhënësit në korridor dhe është pyetur “se pse po shëtitë nëpër korridor” e se më pas, sipas tij, e kanë sulmuar aty.
Ai thotë se djali i është ankuar në shtëpi për dhimbje fizike që kishte ndjerë pas rrahjes që dyshohet se mësimdhënësit kryen.
"...djali kishte pasur ankesa për dhimbje, kam shkuar e kam marrë dhe e kam dërguar në ambulancën e Malishevës dhe pas kontrollit kanë konstatuar lëndime dhe më kanë thënë se e kanë obligim që ta lajmërojnë rastin në polici", i ka thënë KOHËS prindi i 12-vjeçarit.
Tash, po pret që organet përgjegjëse të ndërmarrin masat adekuate.
"Me mua nuk kanë asgjë ata mësimdhënës, as që i njohë mirë, vetëm si figura i kam parë, por kërkoj nga shteti të ndërmarr masa ndaj tyre sipas ligjit", ka thënë ai.
S.B. ka thënë tutje se djalin po e dërgon te psikiatri sipas udhëzimit të mjekut.
Ndërkohë në SHFMU "Sali Bytyçi", në Shkozë, drejtori Arben Bytyçi ka thënë të shtunën për KOHËN se për rastin u njoftua nga Policia. Ai ka shtuar se nga informacionet që ka, “mësimdhënësit e kanë nxjerrë jashtë nxënësin”, por, shtoi ai, “prindi ka deklaruar se ka pasur edhe dhunë ndaj djalit të tij”. Teksa shton se nuk e di ende versionin e mësimdhënësve.
Drejtori i Drejtorisë Komunale të Arsimit(DKA), në Komunën e Malishevës, Blerim Thaçi ka thënë se nga ana e tyre do të merren masat sipas ligjeve në fuqi dhe do të presin vendimet e institucioneve përkatëse qe merren me shqyrtimin e rastit.
