Komuna e Prizrenit ka njoftuar se nga dita e mërkurë nis regjistrimi i fëmijëve në çerdhen publike në lagjen “11 Marsi”, pranë shkollës fillore “Lekë Dukagjini”. Në këtë njoftim është theksuar se kjo çerdhe do të ketë edhe staf profesional për ofrimin e shërbimeve përkatëse. Mirëpo, lidhur me këtë çështje ka reaguar partia opozitare Nisma Socialdemokrate, duke shprehur qëndrimin se Drejtoria Komunale e Arsimit ka filluar regjistrimin e fëmijëve në çerdhen publike të porsandërtuar pa e përzgjedhur stafin. Ndërkaq, DKA-ja gjatë ditës ka publikuar konkursin për vendet e lira të punës në institucionin publik parashkollor në lagjen “11 Marsi”.
Fillimisht, Komuna e Prizrenit përmes komunikatës ka bërë të ditur se në këtë çerdhe publike do të mund të regjistrohen 160 fëmijë të moshës 3 deri në 6 vjeç, përkatësisht 120 fëmijë në gjuhën shqipe, 20 në gjuhën boshnjake dhe 20 në gjuhën turke, raporton KOHA.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Kopshti do të ketë staf profesional, të përgatitur për ofrimin e gjitha shërbimeve edukative, kognitive (njohëse), emocionale dhe shëndetësore (edukatoret e kualifikuara, pedagogun, psikologun dhe mjekun). Raporti edukatore-fëmijë është 2:22. Qëndrimi i fëmijëve në kopsht është tërëditor”, thuhet në komunikatën e Komunës, ku sqarohet se regjistrimi i fëmijëve bëhet çdo ditë pune nga ora 10:00 deri në orën 15:00 në objektin e çerdhes në lagjen “11 Marsi”, deri më datën 20 gusht 2020.
Informacionet për kushtet për regjistrim si dhe për dokumentacionet e nevojshme janë publikuar nga Drejtoria e Arsimit, ku sqarohet se çmimi për një fëmijë është 80 euro në muaj, për dy fëmijë është 120 euro dhe për tre fëmijë është 150 euro.