Vdiq në moshën 41-vjeçare aktori Devin Harjes

Aktori i “Manifest” vdiç si pasojë e komplikimeve nga kanceri

Devin Lee Harjes, i njohur për rolin e boksierit legjendar Jack Dempsey në serialin e njohur të HBO-së “Boardwalk Empire”, ka vdekur të martën, më 27 maj, në New York, në moshën 41-vjeçare. Lajmin e konfirmoi për Fox News Digital përfaqësuesi i tij, David Williams, ka raportuar Fox News.

Sipas familjes, aktori vdiq si pasojë e komplikimeve nga kanceri, në spitalin Mount Sinai West në Manhattan. Ai ishte diagnostikuar me kancer gjatë dimrit.

“Ai ishte një artist me përkushtim të jashtëzakonshëm, që kurrë nuk jepte më pak se 100% në asnjë rol që merrte përsipër. Si njeri, ishte bujar, i dashur, i kuptueshëm dhe i përkushtuar ndaj familjes dhe miqve. Ishte kalorës i shkëlqyer dhe kishte një lidhje të veçantë me kafshët", deklaroi përfaqësuesi i tij.

Harjes debutoi në televizion në vitin 2011 me serialin “Boardwalk Empire”, ku luajti krah aktorëve Steve Buscemi, Michael Kenneth Williams, Michael Pitt dhe Richard Harrow. Roli i tij i dha famë në qarqet artistike për portretizim autentik dhe të fuqishëm.

Më pas, Harjes luajti në serialin misterioz “Manifest”, ku interpretoi karakterin Pete Baylor. Ai ishte gjithashtu pjesë e serialeve “Blue Bloods”, “Daredevil”, “Elementary” dhe “Gotham”.

Në film, ai shkëlqeu në dramën “The Forest is Red”, që i solli çmimin “Aktori më i mirë” në Festivalin Ndërkombëtar të Filmit në Tolentino, Itali. U vlerësua gjithashtu për rolin e tij në filmin “Boyz of Summer” (të vitit 2012), një histori e ndjeshme për rritjen dhe sfidat e rinisë. Në vitin 2017, ai u shfaq në filmin “Rebel in the Rye”, përkrah Nicholas Hoult dhe Kevin Spacey, mbi jetën e autorit legjendar J.D. Salinger.

I lindur në Lubbock, Texas, Harjes studioi aktrim në universitet dhe nisi karrierën në teatrin e zonës Dallas–Fort Worth, përpara se të zhvendosej në New York.

Përveç aktrimit, Harjes ishte edhe një praktikues i rregullt i arteve marciale dhe kishte një sens humori të veçantë.