“Edon Zhegrova është këtu me ne. Është e mundur që ai të rifillojë stërvitjen me ekipin profesional nga e hëna kështu që mund të mbështetemi tek ai për këtë sezon”, kishte thënë javën e kaluar në konferencë për media presidenti i Lillet, Olivier Letang. Por e ardhmja e sulmuesit të Kosovës ende nuk dihet. Ka raportime e zhvillime të ndryshme rreth tij. Pati edhe të premten.
Të ardhmen e Zhegrovës nuk e di as vetë trajneri Bruno Genesio. Ai ka folur të premten në konferencën për shtyp për çështjen e tij para ndeshjes së parë të sezonit të ri në kampionatin elitar të Francës. Lille të dielën nga ora 15:00 luan në udhëtim te Bresti, por me shumë gjasë pa Zhegrovën në formacion.
“Edonin nuk e pata në stërvitje këtë javë. Ai vazhdon të stërvitet me ekipin e dytë. Nuk kam asnjë informacion tjetër për t’ju dhënë në lidhje me të. Nuk e di nëse mund të mbështetem tek ai këtë sezon”, u shpreh Genesio.
Këtë javë u raportua se Zhegrova do të largohet nga Lille për ta vazhduar karrierën te skuadra e Marseillet. Këto raportime i mohoi presidenti i Lillet ku shtoi se nuk ka biseduar asnjëherë me Marseillen për reprezentuesin e Kosovës.
Por edhe pas deklaratave të presidentit, Zhegrova është në bisedime me Marseillen.
Edhe
Genesio flet sërish për Zhegrovën
Këtë e konfirmoi të premten edhe eksperti i transferimeve, Fabrizio Romano. Ai shkroi se 26-vjeçari ka pranuar “ofertë të rëndësishme” nga Marseille.
Klubi i madh francez dëshiron që Zhegrovën ta ketë pjesë të skuadrës, ku do të garonte në konkurrencë të fortë me Mason Greenwoodin për vendin e titullarit.
Lille për shërbimet e Zhegrovës i ka kërkuar 20 milionë euro, pavarësisht se ai nuk ka luajtur prej dhjetorit të vitit të kaluar. Madje, ndeshjen e fundit e pati pikërisht ndaj Marseillet në udhëtim, në barazimin 1:1. Kishte luajtur vetëm në pjesën e parë. Zhegrova tash e një kohë të gjatë vuan nga lëndimi i muskujve aduktor. Mendoj se ishte lëndim që do ta kalonte lehtë, por nuk doli i tillë. Ai nuk ishte pjesë e kampit stërvitor që Lille e mbajti në Iserlohn të Gjermanisë.
Për Zhegrovën pati raportime se janë interesuar edhe disa klube të tjera, përfshirë edhe kampionin e Italisë, Napolin.
Edhe
Zhegrova kthehet te Lille, ftohet ndaj Monacos
Zhegrova me Lillen ka zhvilluar 107 ndeshje ku ka kontribuar me 26 gola dhe 18 asistime. Kontrata i përfundon në verën e vitit të ardhshëm.
Me Përfaqësuesen e Kosovës ka pesë gola të shënuar e tri asistime në 42 ndeshje.
