Çfarë sezoni për Bayer Leverkusenin. Kampion i Gjermanisë, në finale të Kupës dhe Ligës së Evropës. “Tripleta” është e arritshme. Për më tepër, Leverkuseni nuk ka humbur në asnjë prej 50 ndeshjeve të këtij edicioni.
Pikërisht në mes të kësaj arritjeje qëndron kapiteni i Zvicrës, Granit Xhaka, shpirti i Leverkusenit.
Vështirë se ndonjë futbollist tjetër është dominues sa Xhaka këtë edicion. Motori i mesfushës është shtylla kryesore e lojës së Leverkusenit. Luajti rol të rëndësishëm në suksesin e klubit të Bundesligës. Por, arritjet e tij janë përtej Gjermanisë.
Sipas statistikave të Qendrës Ndërkombëtare për Studime Sportive (CIES), Xhaka është një nga lojtarët më me ndikim në botë në sezonin 2023/24. Xhaka është i dyti në botë.
Nga 100 pikët e mundshme në statistikë, Xhaka ka 92.3 për qind të saktësisë në goditje, pasime, driblime, krijimin e rasteve, përfundimin e aksionit dhe duelet ajrore. Përveç këtyre, janë vlerësuar edhe rezultatet e ekipit dhe minutat e luajtura.
Xhaka kryesohet vetëm nga Rodri i Manchester Cityt, i cili ka një numër të pabesueshëm – 98.56 për qind të saktësisë. Por Xhaka mund ta kapërcejë spanjollin. Xhaka ka më shumë minuta në fushën e lojës se Rodri. Xhaka ka 2.808 minuta, kurse Rodri 2.757 minuta.
Në një prej gjashtë statistikave, Xhaka ndan vendin e parë me Toni Kroosin e Real Madridit. Kanë numrin maksimal të pikëve për pasime. Këtu Rodri mbetet prapa me saktësi prej 93.9 për qind.
“Në Bundesligë askush nuk mund ta mposhtë motorin e mesfushës kur bëhet fjalë për ndikim. Vetëm shoku i skuadrës Florian Wirtz i afrohet Xhakës. Vështirë se ndonjë lojtar në botë është aq i rëndësishëm për ekipin e tij sa Xhaka për kampionët e Gjermanisë. Ndikimi i tij në Zvicër do të jetë po aq i madh nëse ai drejton ekipin në fushë si kapiten në Kampionatin Evropian”, shkruan “Blick”.
Xhaka në 47 ndeshje ka shënuar tri gola dhe ka kontribuar me dy asistime. Leverkuseni ndeshjen e fundit në Bundesligë e luan të shtunën ndaj Augsburgut. Më 22 maj në finale të Ligës së Evropës do të përballet me Atalantan, kurse më 25 maj do ta zhvillojë finalen e Kupës së Gjermanisë ndaj Kaiserlauternit.
Titullin në Bundesligë e ka siguruar, ndërsa synon suksesin edhe në Ligën e Evropës dhe në Kupën e Gjermanisë.
LEXO EDHE:
