Fitorja 1:0 ndaj Austrisë dhe paraqitja e mirë ndaj Spanjës, ndonëse ndeshja u humb 2:1, bënë që te Përfaqësuesja U19 e Kosovës në futboll të ëndërrojnë Kampionatin Evropian. Më pas erdhi humbja 2:0 nga Sllovenia dhe gjasat u shuan.
Por paraqitja në fund të marsit në turneun e raundit elitar në Slloveni, bëri që Kosova U19 të vlerësohet lart. Kjo gjeneratë deri më tani ka arritur sukseset ndër më të mëdha sa u takon përfaqësueseve të Kosovës në futboll.
Lider në fushë, përkatësisht kapiten i kësaj gjenerate, është mbrojtësi i qendrës, Davud Sylaj.
18-vjeçari është i lindur në Zvicër, por e përfaqëson me nder Kosovën. Ai i kompletoi ndeshjet me Austrinë, Spanjën e Slloveninë. Në nëntor, në raundin e parë të kualifikimeve, kompletoi si kapiten ndeshjet me Sllovakinë dhe Ukrainën, ndërsa nuk u aktivizua me Maltën.
Periudha e Davud Sylajt me Kosovën U19 ka përfunduar. Por ai flet me krenari për të arriturat.
“Jam shumë krenar që si kapiten e kam udhëhequr këtë gjeneratë. Bëhet fjalë për futbollistë me qasje profesioniste, që luajnë në top-klube të vendit dhe në Evropë. Jam, po ashtu, shumë krenar që mund ta përfaqësoj vendin dhe ta udhëheq si kapiten ekipin”, ka thënë Sylaj për KOHËN.
Ai vlerëson se grupi i Kosovës U19 ishte prej më të fortëve në raundin elitar. Por paraqitjen e vlerëson shumë të mirë. Përmend edhe moshën e re të lojtarëve në krahasim me përfaqësueset e tjera.
Sipas Sylajt, Kosova U19 kishte kohë të limituar për përgatitje. Derisa përfaqësuese të tjera kanë pasur stërvitje për një javë, lojtarët e Kosovës kishin një stërvitje para ndeshjes. Kjo ka ndikuar, thotë mbrojtësi i qendrës.
“Por paraqitja në përgjithësi ishte e mirë. Ishte një përvojë e veçantë. Me pak fat kemi mundur edhe të kualifikohemi. Organizimi, mentaliteti dhe disiplina ishin në nivel të lartë. Si kapiten më kanë respektuar të gjithë. Besoj që i kam ndihmuar shumë ekipit”.
Sylaj nisi me Kosovën U15 që në vitin 2019. Më pas luajti me Zvicrën U17. U kthye te Kosova U17 dhe vazhdoi te Kosova U19. Hapi i ardhshëm është Kosova U21.
“Kam shumë lojë me Kombëtaren e Kosovës që prej moshës 15-vjeçare. Kam nisur te Zvicra. Më kanë ftuar vazhdimisht, por asnjëherë nuk e kam ndier veten mirë. Edhe me U17 më kanë ftuar, por vendimi im ishte që mundin ta jap për Kosovën. Jam shumë krenar që vendosa për vendin tim, që e dua shumë”, thotë Sylaj.
Ai shpreson që të ftohet dhe të jap kontribut te Kosova U21 e më pas te seniorët.
Sylaj ka kontratë profesionale me Grasshopperin, njërin prej klubeve më të njohura në Zvicër. Ende po luan me gjenerata të reja dhe me ekipin e dytë në kategorinë e tretë helvetike.
“Jam i kënaqur me zhvillimin. Kam ngritje në çdo test e në çdo ndeshje. Besoj se shpejt do të debutoj edhe në Superligë, më së largu në vitin e ardhshëm”, thotë mbrojtësi, familja e të cilit është nga Mazniku i Deçanit, por që jeton në Zvicër që nga viti 1991.
Davudi ka nisur karrierën në Akademinë e Zuerichut. Te Grasshopperi kaloi tre vjet më parë.
Si model për mbrojtës të qendrës e ka Sergio Ramosin.
“Ramosin e kam shumë si model, është pasqyra ime”, thotë Sylaj, që viteve të ardhshme mund të shndërrohet në lider të mbrojtjes së Kosovës. Ecuria e deritashme jep shpresë për këtë.