Telashe të brendshme dhe protesta të tifozëve – Milani në moment të vështirë

Edicioni i Milanit preku pikë tjetër të ulët të dielën. Humbja 3:2 në shtëpi nga Atalanta e la shtatë herë kampionin e Evropës duke u përpjekur të sigurojë kualifikimin në Ligën e Kampionëve dhe në të njëjtën kohë shtoi presion mbi trajnerin Massimiliano Allegri.

Milani ra në vendin e katërt në Serie A, pas Juventusit, me Romën në formë që ka pikë të barabarta. Kështu skuadra kuqezi e komplikoi edhe më shumë garën për katër vendet e para në Serie A, që dërgojnë në Champions. Kanë mbetur edhe dy xhiro.

Milani po përballet me një krizë identiteti. Duke e kaluar këtë edicion jashtë garave evropiane, pasi doli i teti në edicionin e kaluar, ekipi është në rrezik të një viti të dytë jashtë garës elitare evropiane.
Shenjat paralajmëruese ishin të dukshme për muaj të tërë. Skuadra mblodhi vetëm 25 pikë në gjysmën e dytë të edicionit. Është totali më i vogël i Milanit në tetë vjet, duke e shndërruar atë që dukej si sfidë për titull në një betejë të tensionuar për katër vendet e para në tabelë.

Edhe pse rezultati u ngushtua me dy gola në minutat shtesë kundër Atalantas, rikthimi i vonshëm bëri pak për të fshehur një performancë të zbehtë ofensive. Lojtarë kyç, si Christian Pulisic, Santiago Gimenez dhe Rafael Leao nuk kanë arritur nivelin që pritej.

Shqetësimi kryesor për drejtuesit e Milanit është shkëputja në rritje midis mesfushës dhe mbrojtësve. Struktura taktike e Allegrit ka dështuar ndaj ekipeve më agresive, me trajnerin që pranoi përgjegjësinë për dështimin.

“Kur mungojnë rezultatet, unë jam personi i parë përgjegjës, pasi unë jam trajneri. Këta lojtarë gjithmonë kanë dhënë gjithçka. Nuk duket të kërkojmë faj tani, por të përqendrohemi në mënyrën se si arritëm shumë fitore këtë edicion. Duhet të marrim edhe dy të tjera”, ka theksuar Allegri. 

“Nuk ka kuptim të flasim për atë që ka ndodhur deri më tani, sepse nuk mund ta ndryshojmë. Është e natyrshme që askush nuk e priste një moment kaq të vështirë”.

Ai e bëri të qartë se synimi kryesor është kthimi në Champions. Sipas Allegrit vendimtare është që të kalohet kriza në rezultate.

Forma e dobët e skuadrës ka shkaktuar frustrim të madh në mesin e tifozëve. Pas kritikave të zëshme ndaj pronarëve dhe drejtorit ekzekutiv, Giorgio Furlani, shumë tifozë u largua nga stadiumi shumë kohë para fishkëllimës së fundit në ndeshjen ndaj Atalantas.

Drejtori sportiv i Milanit, Igli Tare, pranoi se klubi nuk mund të fshihej më, duke i vlerësuar protestat e tifozëve si të kuptueshme.

“Duke i parë ndeshjet e fundit mund të thuhet që mungoi vëmendja e duhur. Nuk ka kuptim ta mohojmë, të gjithë duhet të marrin pjesën tonë të përgjegjësisë”, ka thënë Tare.

E ardhmja e Allegrit varet nga kualifikimi në Champions. Kështu dy ndeshjet e fundit të Milanit, në udhëtim ndaj Genoas dhe në shtëpi ndaj Cagliarit, kanë rëndësi shumë të madhe.