Juljan Shehu dhe Etrit Berisha janë shprehur optimistë se Shqipëria do ta ruajë pozitën e parë në Grupin C1 të Ligës së Kombeve.
Dy futbollistët të hënën janë paraqitur në konferencë për shtyp, në prag të dy ndeshjeve të fundit, ndaj Finlandës dhe Bjellorusisë.
Shqipëria të enjten e pret Finlandën në “Air Albania”, ndërsa më 15 nëntor luan ndaj Bjellorusisë në terren neutral, përkatësisht në Budapest të Hungarisë.
Janë ndeshje vendimtare sa i takon garës për vendin e parë në grup në Ligën C dhe promovimit në Ligën B.
Shqipëria është e para në grup me nëntë pikë. Bjellorusia dhe Finlanda kanë nga shtatë pikë dhe mbajnë pozitat dy e tre. San Marino është pa pikë në vendin e fundit.
“Unë besoj se çdo ndeshje ka vështirësinë e vet dhe patjetër që ne duhet të japim maksimumin dhe ta përgatisim atë në mënyrën më të mirë të mundshme. Presioni është pjesë e lojës, kështu që ne jemi profesionistë dhe duhet të dimë se si ta përballojmë. Patjetër që objektivi ynë është të qëndrojmë në vendin e parë në grup, të ruajmë kryesimin dhe besoj se deri në fund do t’ia dalim”, u shpreh mesfushori Shehu.
Mendim të njëjtë ndan portieri Berisha.
“Çdo ndeshje, besoj, ka historikun e vet dhe ne duhet të fokusohemi te objektivi që kemi. Objektivi ynë është ta fitojmë këtë ndeshje dhe të shkojmë përpara, duke ruajtur vendin e parë”, ka thënë Berisha.