Sheareri e përfshin sërish Xhakën në formacionin më të mirë të javës

Ikona e Premier Leagues, Alan Shearer, e ka përfshirë Granit Xhakën në formacionin më të mirë të xhiros së 11-të të elitës angleze.

Faqja zyrtare e Premier Leagues të hënën e ka publikuar përbërjen më të mirë të xhiros së zhvilluar në fundjavë, sipas vlerësimit të ish-sulmuesit të njohur.

Xhaka është përzgjedhur si mesfushor qendror i përbërjes më të mirë. Ai pati paraqitje shumë të mirë në barazimin 2:2 të Sunderlandit me Arsenalin.

“Xhaka sërish ishte shembull. Ai e mbajti topin në lëvizje, e ndihmoi mbrojtjen dhe e udhëhoqi Sunderlandin drejt një rezultati impresiv ndaj liderit të ligës”, ka shkruar Shearer për mesfushorin 33-vjeçar.