Jerevan, 7 shtator – “Unë nuk i kërkoj rekordet”, ka thënë Cristiano Ronaldo shpesh në vjetët e fundit. “Rekordet më kërkojnë mua”, ka shtuar ylli portugez.
Dhe Ronaldo vazhdon të thyejë rekorde dhe t’u afrohet atyre. Të shtunën mbrëma ai i shënoi dy gola në fitoren 5:0 të Portugalisë ndaj Armenisë në Jerevan. Për Portugalinë ishte ndeshja e parë e kualifikimeve për Kupën e Botës 2026.
Ronaldo tani i ka 38 gola në 48 ndeshje kualifikuese për Kupën e Botës. E ka kaluar Lionel Messin, që i ka 36 gola në 72 paraqitje kualifikuese për Botëror.
Ronaldo është i dyti e Lionel Messi i treti në këtë listë. Duket befasi që dy superyjet nuk janë në krye të listës. I pari është Carlos Luiz i Guatemalës, me 39 gola në 47 ndeshje kualifikuese për ngjarjen globale.
Ruiz ka shënuar gola në kualifikimet për Botërorët prej 2002 deri në 2018.
Ronaldo e Messi shënojnë gola në kualifikime ende. Por Messi ka thënë se e ka luajtur ndeshjen e fundit kualifikuese për Botëror para tifozëve në Argjentinë. Ndërkohë Ronaldon e presin edhe pesë ndeshje në kualifikimet për Botërorin që vitin tjetër mbahet në SHBA, Meksikë e Kanada.
Ronaldo ka shënuar gola në kualifikimet për Kupën e Botës 2006, 2014, 2018, 2022 e 2026. Kampanjën më të suksesshme e kishte për botërorin 2018, kur i realizoi plot 15 gola në nëntë ndeshje.
Messi ka shënuar gola në kualifikimet për Botërorin 2010, 2014, 2018, 2022 e 2026. Dhjetë gola i kishte në 14 paraqitje në kualifikimet për Botërorin 2014.
Me ritmin aktual është pak e besueshme që Ronaldo nuk do ta vendosë edhe rekordin për gola në kualifikime. Messi dhe portugezi 40-vjeçar tashmë kanë rekorde të shumta të futbollit.
Ronaldo është bindshëm golashënuesi më i mirë në futbollin ndërkombëtar. Në 222 paraqitje për Portugalinë i ka shënuar plot 140 gola. I dyti në listë është Messi me 114 gola në 194 paraqitje. Ali Daei i Iranit është lojtari i vetëm tjetër që ka arritur shifrën e 100 golave. Ai ka 108 gola në 148 paraqitje.
14 gola superylli portugez i ka në Kampionate Evropiane e tetë në Kampionate Botërore. Në Ligën e Kombeve i ka shënuar 15 gola, në kualifikime për Evropian 41, në kualifikime për Botëror 38, në Kupën e Konfederatave dy dhe në miqësore 22.
Golin e parë për Portugalinë, Ronaldo e ka shënuar që më 12 qershor të vitit 2004. Golat e radhës i synon menjëherë të martën mbrëma ndaj Hungarisë në Budapest.