Suhareka është duke barazuar 1:1 me Ballkanin në Suharekë në ndeshjen e fundit të kampionatit, ndërsa pjesa e parë zgjati plot 55 minuta.
Pati dy herë ndërprerje nga pesë minuta, pas rishikimeve të situatave në VAR.
Ballkani kaloi në epërsi me golin e Bernard Karricës nga penalltia në minutën e 33-të. Gjyqtarit Gramos Shala iu deshën pesë minuta për të konfirmuar se pati ndërhyrje të palejuar në zonë.
Karrica më pas në minutën e 43-të u përjashtua nga loja, pasi e goditi në fytyrë me këmbë sulmuesin Liridon Fetahajn e Suharekës.
Edhe momenti i kartonit të kuq u pa në VAR.
Suhareka i barazoi shifrat në minutën e katërt të kohës shtesë. Goli u anulua fillimisht për pozitë jashtë loje. Mevlan Zeka depërtoi deri në zonë dhe gjuajti, ndërsa topin në portën e vet e shtyu gabimisht Gentrit Halili.
Ky gol u pranua me pesë minuta vonesë pas konfirmimit të VAR-it.
