Shqiptari Luis Hasa i është bashkuar skuadrës elitare të Serie A, Lecces, nga skuadra e madhe italiane, Juventus.
Hasa 20-vjeçar është prezantuar si futbollist i Lecces të enjten.
Drejtori sportiv i Lecces, Stefano Trinchera, i është gëzuar transferimit të mesfushorit me tipare sulmuese.
“Ai është djalosh italiano-shqiptar që u lind në vitin 2004. Ai vjen nga Juventusi që e ka të drejtën e blerjes së tij në të ardhmen. Ka perspektivë të madhe. Ishte protagonist kur Italia e fitoi Kampionatin Evropian U19. Njerëzit flasin fjalë të mëdha për të dhe ne dëshirojmë të punojmë me futbollistë të talentuar. Është futbollist interesant”, ka deklaruar Trinchera.
Te skuadra e Lecces janë edhe shqiptarët tjerë, Ylber Ramadani dhe Medon Berisha. Hasa do të bëhet futbollisti i tretë shqiptar i këtij ekipi.
“Të gjithë më kanë folur mirë për Leccen që ka grup të lojtarëve të rinj. Jam shumë i lumtur që jam këtu dhe do të jap çdo gjë për skuadrën. Gjithmonë e kam pritur Serie A. Do të punojë shumë për të qëndruar lartë dhe shpresoj që puna e madhe do të shpaguhet”, ka deklaruar Hasa fillimisht.
Edhe
Napoli transferon një tjetër shqiptar
Ai ka thënë se dëshiron që të jap kontribut sa më shumë në fitimin e ndeshjeve.
“Jam futbollist i krahut me tipare sulmuese, por mund të luajë në shumë role. Sa u përket lojtarëve, më pëlqejnë ata që janë të shkurtër dhe të mirë me topin, si Bernardo Silva. E kam pritur këtë moment deri në momentin e fundit. Ishte befasi e madhe për mua kur dëgjova për Leccen. Isha shumë i lumtur”, ka deklaruar Hasa.
Hasa vlerësohet si një prej lojtarëve më perspektivë në futbollin italian.
