(E përditësuar) Kosova shkëlqeu për 85 minuta ndaj Austrisë. Shënoi gol me Fisnik Asllanin dhe qëlloi shtyllën me Milot Rashicën. Pati edhe disa mundësi tjera shënimi. Por, nuk e ruajti epërsinë dhe në fund barazoi 1:1 me austriakët që luajtën në Kupën e Botës 2026 deri në 1/16 e finales.
Ndeshja e zhvilluar të dielën mbrëma në stadiumin “Fadil Vokrri” në Prishtinë ishte e xhiros së katërt e Grupit B3 të Ligës së Kombeve.
Austria mbetet e pamposhtur në katër ndeshjet e para. Me dy fitore e dy barazime prin në grup me tetë pikë. Kosova është e dyta me pesë pikë. Irlanda që ka katër pikë në vendin e tretë, e ka një ndeshje më pak të luajtur, atë ndaj Izraelit. Izraeli aktualisht është i fundit me një pikë.
Kosova pati mundësi në pjesën e parë, por edhe Austriakët u shfaqën rrezikshëm në disa raste. Portieri Amir Shaipi ishte në formë të mirë dhe nuk u mposht.
Në pjesën e dytë, “Dardanët” patën sërish paraqitje të mirë. Përzgjedhësi Franco Foda vendosi për ndryshime në formacion dhe e inkuadroi në lojë Fisnik Asllanin në minutën e 66-të. Asllani e zëvendësoi Vedat Muriqin. Vetëm katër minuta më vonë, pas një lëvizjeje të mirë të Edon Zhegrovës në zonë, shënoi sulmuesi i Hoffenheimit. Asllani gjuajti saktë për 1:0, për golin e pestë me Kosovën në 20 paraqitje.
Zëvendësuesi tjetër, Milot Rashica, që e zëvendësoi Baton Zabërgjën, doli në rast të mirë për shënim po ashtu. Ai ishte i pafat në minutën e 73-të kur e qëlloi shtyllën e majtë të portierit të Austrisë, Alexander Schlager. Rashica gjuajti me të majtën, por jo mjaftueshëm për ta shënuar golin e dytë të Kosovës. Pas topit të kthyer tentoi edhe Veldin Hoxha, por portieri Schlager reagoi mirë.
Pak para se të mbyllej ndeshja, Kosova u dënua dhe pranoi gol. Në minutën e 84-të, Sasha Kalajxhiq harkoi në zonë për mesfushorin Christoph Lang. Lang gjuajti saktë me kokë dhe e dërgoi topin prapa shpinës së portierit Shaipi.
Kosova në nëntor luan në shtëpi ndaj Izraelit dhe në udhëtim tek Irlanda. Austria e pret Irlandën dhe luan në udhëtim tek Izraeli.
88' Milot Rashica ka pësuar një lëndim dhe është detyruar të largohet nga fusha. Në vend të tij u inkuadrua Meriton Korenica.
85’ Austria ka barazuar rezultatin ndaj Kosovës. Mesfushori i LASK-ut, Christoph Lang, barazoi rezultatin pas gjuajtjes me kokë nga zona.
80’ Ermal Krasniqi dhe Vesel Demaku inkuadrohen në lojë, ndërsa largohen Edon Zhegrova dhe Veldin Hoxha. Përzgjedhësi Foda inkuadron lojtarë të freskët dhjetë minuta para fundit.
77’ Kosova ka shpëtuar pa pranuar gol. Pas një harkimi që nuk premtonte shumë, me vonesë drejt topit shkoi sulmuesi Michael Gregoritsch dhe topi doli jashtë.
73’ Milot Rashica ka qenë i pafat në minutën e 73-të kur e qëlloi shtyllën e majtë të portierit të Austrisë, Alexander Schlager. Rashica gjuajti me të majtën, por jo mjaftueshëm për ta shënuar golin e dytë të Kosovës. Pas topit të kthyer tentoi edhe Veldin Hoxha, por portieri Schlager reagoi mirë. Rezultati mbetet 1:0. Futja në lojë e Rashicës dhe Asllanit e ka ngjallur lojën e Kosovës. Ka ngjallur edhe shikuesit në “Fadil Vokrri”.
70' Asllaniiiiiii
Fisnik Asllani ka shënuar gol me të hyrë në lojë. Asllani shënoi me asistim të Edon Zhegrovës. Kosova në epërsi 1:0 ndaj Austrisë.
67’ Zëvendësim i dyfishtë te Kosova. Përzgjedhësi Franco Foda ka futur në lojë Fisnik Asllanin në vend të Vedat Muriqit. Nga loja është larguar edhe Baton Zabërgja. Vendin e tij e ka zënë Milot Rashica.
55’ Alexander Schlager e ka shpëtuar Austrinë pa pranuar gol. Portieri austriak priti gjuajtje me kokë të Veldin Hoxhës pas harkimit të Mërgim Vojvodës.
51’ Kosova shënon, goli anulohet. Pas gjuajtjes së Lumbardh Dellovës, portieri reagoi, por jo mirë. Nga topi i kthyer shënoi Veldin Hoxha. Por, mesfushori i Kosovës ishte në pozitë jashtë loje dhe goli u anulua.
45’ Nis pjesa e dytë
23’ Pas disa minutave ku Austria kishte iniciativë, Kosova u shfaq rrezikshëm me një aksion shumë mirë të ndërtuar. Pasimit të mirë të Edon Zhegrovës iu përgjigj bukur Dion Gallapeni me harkim zhargas në zonë. Por, asnjëri prej lojtarëve të Kosovës nuk ishte afër për ta rrezikuar portën e austriakëve.
10’ - Amir Shaipi e shpëton Kosovën nga pranimi i golit.
Pas gjuajtjes së rrezikshme me kokë të kapitenit Michael Gregoritsch, portieri Amir Shaipi e devijoi topin në këndore.
9’ - Veldin Hoxha i afrohet golit të shënimit te Kosova.
Pas harkimit të Dion Gallapenit nga e majta, Hoxha gjuajti nga zona por topi shkoi jashtë.
1’ - Nis ndeshja mes Kosovës dhe Austrisë.
Me topin e parë luajnë “Dardanët”.
Vojvoda: Kjo pikë na jep vetëbesim
Mërgim Vojvoda e çmon pikën ndaj Austrisë. Ai ka thënë se barazimi i jep vetëbesim Kosovës.
“Jemi të dëshpëruar, por ishte një lojë e vështirë. Kishim rastin për 2:0, por nuk e deshi. Pranuam një gol dhe na mungoi fati. Miloti bëri aksion fantastik, por i mungoi fati. Po të shënonim për 2:0, loja do të përfundonte. Edhe ata reaguan mirë dhe u kthyen në lojë. Austria është Kombëtare e madhe dhe e dëshmoi këtë. Ky barazim na bënë më të fortë. Të marrësh pikë me kombëtare si kjo të jep vetëbesim, na bën të ndihemi më të fortë si ekip. Është pikë e mirë, ndonëse kemi mundur të fitojmë”, ka thënë Vojvoda.
Gallapeni: Ishim të bashkuar
Dion Gallapeni e ka vlerësuar pozitivisht barazimin me Austrinë.
“Goli në fund na zhgënjeu pak. Besoj se kemi luajtur ndeshje shumë të mirë. Kishim disa raste. Kemi dy ndeshje në nëntor që janë shumë të rëndësishme. Do të përgatitemi dhe besoj se do të dalim me rezultat pozitiv”, ka thënë mbrojtësi i krahut të majtë.
“Besoj që ishte një ndeshje e mirë nga gjithë ekipi. Ishim kompakt, shumë të bashkuar. Jemi mbrojtur si ekip dhe kemi sulmuar si ekip. Edhe me Irlandën paraqitja ishte fantastike, por edhe sonte kemi dëshmuar se mund të përballemi edhe me Kombëtare të mëdha. Do të synojmë fitore në dy ndeshjet e fundit”, ka shtuar Gallapeni.
Fisnik Asllani: Kemi bërë një ndeshje të mirë
Fisnik Asllani është ndarë i kënaqur me ndeshjen që Kosova e zhvilloi ndaj Austrisë.
Kosova barazoi 1:1 me Austrinë të dielën mbrëma në stadiumin “Fadil Vokrri” në Prishtinë.
“Fatkeqësisht nuk arritëm ta fitojmë lojën. Kish me qenë ndjenja ndryshe nëse e kishim fituar lojën. Kemi bërë një lojë të mirë. Shpresoj që në muajin nëntor të bëjmë dy ndeshje të mira. Energjia ka qenë e lartë, fusha nuk ka qenë më e mira. Jam munduar t’i jap energji ekipit. Jam shumë mirë fizikisht. Muajin e ardhshëm ndeshjen e parë e kemi me Izraelin synojmë që ta fitojmë këtë ndeshje. Do të japim maksimumin për dy ndeshjet e ardhshme”.
Schlager: Kosova luajti me disiplinë të lartë
Portieri Alexander Schlager që u mposht nga Fisnik Asllani në ndeshjen Kosova – Austria, ka lavdëruar “Dardanët” për paraqitje me disiplinë të lartë. Ai ka thënë se ndeshja me Kosovën nuk ishte aspak e lehtë.
“Nuk është e lehtë të luash këtu. Duhet të jemi të kënaqur me pikën. Kosova luajti me disiplinë të madhe. E dimë nga Kupa e Botës se i lejojmë kundërshtarët shumë shpesh në situata për gjuajtje nga zona. Kosova bëri mirë në këtë aspekt. Luftuam dhe u kthyem në lojë. E kemi dhënë më të mirën në katër ndeshjet. Do ta marrim me vete këtë eksperiencë në të ardhmen”, ka theksuar Schlager.
Rangnick ankohet sërish për fushën
Përzgjedhësi i Austrisë ka pasur sërish kritika për fushën në stadiumin “Fadil Vokrri”, njësoj siç kishte një ditë para ndeshjes me Kosovën.
Dueli përfundoi 1:1.
Rangnick ka thënë se është i lumtur që Austria mori pikë.
“Ishte e rëndësishme që ne sërish arritëm të merrnim pikë. Jemi të kënaqur me këtë pikë. Kushtet ishin të vështira ashtu siç e kemi pritur. Ishte e qartë se nuk do të mund të kishim ndeshje të bukur me këto kushte të fushës. Goli që e pranuam nuk ka të bëj asgjë me fushën. Duhet të përballesh me lojën që bën kundërshtari. Kishim shumë pasime të pasakta të cilat nuk ishin vetëm si pasojë e fushës. Tani, sidoqoftë, është e rëndësishme që e përfunduam këtë cikël të katër ndeshjeve pa humbje dhe po shohim para drejt ndeshjeve të nëntorit”, ka deklaruar përzgjedhësi i Austrisë pas ndeshjes në Prishtinë.
Franco Foda i kënaqur me paraqitjen
Selektori i Kosovës, Franco Foda, është i kënaqur me paraqitjen ndaj Austrisë. Ai ka treguar që lojtarët janë të mërzitur që nuk kanë arritur fitore. Të dielën mbrëma në “Fadil Vokrri”, Kosova e Austria luajtën 1:1.
“Lojë përfundimisht e mirë, e madhe. Atë që e kemi diskutuar, lojtarët e kanë zbatuar. Jam shumë i kënaqur me ekipin, me secilin prej lojtarëve. Kemi mundur të shënojmë edhe për 2:0. Ishim të koncentruar si në mbrojtje ashtu edhe në sulm. E pritëm një fitore, por nuk doli ashtu”, ka thënë Foda.
“Lojtarët janë pak të mërzitur. Para dy vjetësh erdha dhe në atë kohë me një barazim 1:1 me Austrinë do të ishim të gëzuar. Sot janë të mërzitur. Austria është skuadër e madhe. Është e 23-ta në ranglistën e FIFA-s. Ka luajtur në Botëror e Evropian. Tani presim jo vetëm barazime, por edhe fitore me ekipet e mëdha”, ka shtuar Foda.
Ai e ka vlerësuar paraqitjen me notë maksimale. Foda ka treguar se Zhegrova ka kërkuar zëvendësimin, njëjtë si Vedat Muriqi.
“Kam besim të plotë në ekip, përndryshe nuk do të isha selektor. Jam krenar që secili lojtar luajti më shumë minuta se që në fakt ka mundur”.
Lang i lumtur me pikën e fituar
Mesfushori Christoph Lang që shënoi për Austrinë në barazimin 1:1 me Kosovën, është shprehur i lumtur për golin e realizuar dhe pikën e fituar. Ai e ka kritikuar fushën në “Fadil Vokrri”.
“Ishte ndeshje e vështirë për secilin në këtë fushë. Ishte ndeshje shumë e luftuar. Qarkullimi i topit ishte i vështirë në fushë. Jam i lumtur për golin. Nuk e kuptova në fillim, por jam i lumtur. Nuk jam shumë i mirë në gjuajtjet me kokë. Lujatëm mirë por mund të jemi të kënaqur me pikën e fituar”, ka thënë Lang pas ndeshjes për “ORF-në”.
Avdullahu: Humbëm dy pikë
Mesfushori i Kosovës, Leon Avdullahu, ishte i shkurtër në përgjigjet që dha pas barazimit 1:1 me Austrinë.
Ai vlerësoi se Kosova i humbi dy pikë të dielën mbrëma në “Fadil Vokrri” në Prishtinë.
“Besoj se i humbëm dy pikë në këtë ndeshje. Por, sonte treguam se çfarë mund të bëjmë”, tha Avdullahu që paraqitet te Hoffenheimi.
Asllani dëshmon se është lojtar i klasës botërore
Fisnik Asllanit nuk iu desh shumë kohë në fushë për të shfaqur aftësitë e sulmuesit të klasës botërore. Për sulmuesin e Hoffenheimit është paraqitja e 20-të me fanellën e “Dardanëve” ndërsa ka pesë gola të shënuar.
Në verë ishte afër transferimit te Leipzigu. Por, mbeti te Hoffenheimi. Edhe asistimi i Edon Zhegrovës ishte mjeshtëror.
Dyshja nga Hoffenheimi i Juventusi e dënojnë Austrinë që nuk mund të dalë në lojën më të mirë. A do t’ia shkaktojë Kosova humbjen e parë Austrisë në këtë edicion të Ligës së Kombeve?
Valon Berisha përshëndetet nga përfaqësuesja e Kosovës
Pak çaste pasi përfundoi pjesa e parë e ndeshjes Kosovë-Austri, mesfushori Valon Berisha është përshëndetur nga përfaqësuesja e Kosovës.
Berisha ka luajtur edhe për Norvegjinë. Ka kontribuuar që të shkruhet historia e përfaqësueses së Kosovës, duke luajtur në faza të rëndësishme të ndërtimit të përfaqësueses. Përshëndetja e Berishës është përcjellë me duartrokitje nga shikuesit.
Kryetari i Federatës së Futbollit të Kosovës, Agim Ademi, i ka ndarë një fanellë speciale.
Koreografia e “Dardanëve”
Dardanët kanë shpalosur koreografi të veçantë para ndeshjes me Austrinë, ku pasqyrohet rrugëtimi i Kosovës ndër vite.
“Ne ëndërruam. Ne vuajtëm. Ne triumfuam”, shkruan në koreografinë e “Dardanëve”.
Kosova luan në Ligën B tani. E nisi nga Liga D e Ligës së Kombeve, që është niveli më i ulët.
Më pas u promovua në Ligën C, e tani në edicionin e pestë të Ligës së Kombeve luan në nivelin e dytë.
Një debutues tek Austria ndaj Kosovës
Një debutues do të jetë në formacionin e Austrisë për ndeshjen ndaj Kosovës.
Austria është e pamposhtur në nisje të Grupit B3 të Ligës së Kombeve, pas fitoreve 3:1 ndaj Izraelit dhe Kosovës, dhe pas barazimit 2:2 në Irlandë.
Rangnick ka bërë gjashtë ndryshime në pozita, në krahasim me ndeshjen e fundit në Dublin që përfundoi 2:2. Alexander Schlager e zëvendëson Florian Wiegelen në portë.
Felix Bacher është futbollisti që debuton me austriakët. Kapiteni Michael Gregorisch kthehet si titullar në sulm.
Kevin Danso kthehet në mbrojtje pasi ishte i suspenduar dhe do të luajë bashkë me Bacherin. Konrad Laimer është titullar në krahun e majtë, ndërsa Stefan Posch në krahun e djathtë.
Xaver Schlager dhe Nicolas Seiwald do të luajnë së bashku në mesfushë.
Ndërkohë, të pranishëm janë edhe Romano Schmid dhe Patrick Wimmer.
Si mesfushor sulmues në krahun e majtë do të luajë Alexander Prass.
Laimer është kapiten i Austrisë.
Formacioni i Austrisë:
A. Schlager; Posch, Bacher, Danso, Laimer, X. Schlager, Seiwald, Wimmer, Schmid, Prass, Gregoritsch
Krasniqi beson se Kosova mund ta arrijë vendin e parë
Ermal Krasniqi para ndeshjes ndaj Austrisë ka deklaruar se Kosova mund ta fitojë ndeshjen ndaj Austrisë që nis në orën 18:00 dhe më pas të mendojë për vendin e parë në Grupin B3.
Krasniqi e ka vlerësuar ndeshjen ndaj Austrisë si njërën prej më të rëndësishmëve në edicionin e pestë të Ligës së Kombeve.
“Lirisht mund të luftojmë për vend të parë. E kemi përgatitur në maksimum ndeshjen dhe besoj që nuk do t’i bëjmë gabimet që i bëmë në lojën e parë me Austrinë. Shpresoj se do t’i qasemi më mirë dhe të arrijmë rezultat pozitiv”, deklaroi Krasniqi fillimisht.
Ai ka thënë se te Kosova janë të koncentruar në fazën defensive, për të mos bërë gabimet që i kanë bërë në ndeshjet e kaluara.
Krasniqi mbështetet në përkrahjen e madhe të tifozëve pasi ndeshja luhet në “Fadil Vokrri” në Prishtinë.
“Gabimet që i bëmë në ndeshjet e kaluara t’i përmirësojmë. Kemi kualitet dhe mund ta fitojmë edhe këtë ndeshje. Luajmë në stadiumin tonë para tifozëve tanë. Me përkrahjen e tyre mund të fitojmë. Në fillim të gjithë e kemi thënë se Austria është favorite. Unë besoj tek ekipi jonë sepse kemi kualitet të lartë në grupin tonë. Besoj se mund ta arrijmë edhe vendin e parë”, ka thënë Krasniqi.
Kosova publikon formacionin, kthehet Muriqi, starton Zhegrova
Selektori i Kosovës, Franco Foda, ka publikuar formacionin startues për ndeshjen ndaj Austrisë.
Kosova nga ora 18:00 luan në “Fadil Vokrri” ndaj Austrisë, në ndeshjen që i takon Grupit B3 të Ligës së Kombeve.
Në portë do të jetë Amir Shaipi.
Mbrojtja përbëhet me Lumbardh Dellovën, Ilir Krasniqin, Ron Raçin, Dion Gallapenin dhe Mërgim Vojvodën.
Në mesfushë janë Leon Avdullahu dhe Veldin Hoxha.
Në sulm janë Vedat Muriqi, Edon Zhegrova dhe Baton Zabërgja.

Foda flet para ndeshjes ndaj Austrisë
Përzgjedhësi i Kosovës në futboll, Franco Foda, pret fitore ndaj Austrisë.
Ai ka folur para ndeshjes kundër Austrisë.
Ndeshja Kosovë – Austri luhet sonte nga ora 18:00 në stadiumin “Fadil Vokrri” në Prishtinë. I takon Grupit B3 të Ligës së Kombeve.
“Në përgjithësi nuk kishim kohë të përgatitemi për këtë ndeshje, pasi kemi udhëtuar nga Hungari, kemi pasur një ditë rigjenerim. Do të shohim sot se çfarë do të ndodhë. E rëndësishme intensiteti i lojës dhe t’i bëjmë ballë Austrisë. Kjo është detyra jonë. Nuk do të ketë ndryshme të mëdha. Ron Raçi do të paraqitet në vend të Albian Hajdarit”, ka thënë Foda.
Ai ka shtuar se qëllimi i Kosovës është fitorja ndaj Austrisë.
“Secilën ndeshje mundohemi ta fitojmë, edhe sot ndaj Austrisë do të jetë qëllimi fitorja. Ne luajmë gjithmonë për fitore. Nuk jam trajner që bëj shumë ndryshime në formacion. Në lojën e kaluar Zhegrova luajti shumë pak, pasi sonte do të luajë”, ka theksuar Foda.