Federata Ndërkombëtare e Futbollit (FIFA) e ka publikuar të hënën ranglistën e fundit të përfaqësueseve të futbollit për meshkuj për vitin 2025.
Në ranglistë ka ndryshime të pakta, në krahasim me publikimin e kaluar të bërë në nëntor.
Kosova përfundon në vendin e 80-të, që është pozita më e mirë ndonjëherë. Në vendin e 80-të ishte edhe muajin e kaluar. Ngritja erdhi pas sukseseve në kualifikimet e rregullta për Kupën e Botës 2026. Kosova përfundoi e dyta në grup. Zvicra e fitoi grupin, kurse Sllovenia e Suedia mbetën prapa Kosovës.
Ndërkohë Shqipëria e përfundon vitin 2025 në pozitën e 63-të.
Sllovakia, me të cilën Kosova përballet në gjysmëfinale të plejofit, më 26 mars në Bratisllavë, është në pozitën e 45-të. Turqia dhe Rumania janë kundërshtarët e mundshëm të Kosovës, nëse të përzgjedhurit e Franco Fodas sigurojnë finalen e plejofit.
Edhe
Kosova me rritjen më të madhe të pikëve në ranglistën e re të FIFA-s
Turqia është e 25-ta, ndërsa Rumania e 47-ta.
Në vitin 2026 si e para në ranglistën botërore do të futet Spanja. Spanja është para kampiones në fuqi të botës, Argjentinës. Pas përfaqësueses së Lionel Messit janë Franca, Anglia e Brazili.
Ndërkohë Portugalia e Cristiano Ronaldos, Holanda, Belgjika, Gjermania dhe Kroacia plotësojnë dhjetëshen e madhe.
Ranglista ka ndryshuar fare pak për dallim nga publikimi i 19 nëntorit. Janë llogaritur vetëm ndeshjet e Kupës Arabe. Kjo ka bërë që dhjetëshja e parë, por edhe shumica e pozitave tjera të mos ndryshojnë.
Ranglisa e ardhshme e FIFA-s publikohet më 19 janar. Në dhjetor ngritjen më të madhe e regjistroi Vietnami, që përparoi për tri pozita.
Edhe
Kosova vazhdon ngritjen pavarësisht humbjes
Për pozitën më të mirë të Kosovës deri më tani në ranglistën e FIFA-s, ka folur edhe presidenti i shtëpisë botërore, Gianni Infantino. Në një videomesazh për ceremoninë e shpalljes së më të mirëve në futbollin kosovar, Infantino përmendi edhe ranglistën.
“Komuniteti futbollistik është entuziazmuar nga paraqitjet e Kombëtares së meshkujve, e cila arriti në fazën plejof për Kupën e Botës dhe regjistroi renditjen më të mirë ndonjëherë në listën botërore të FIFA-s, pozitën e 80-të”, thotë Infantino në videomesazhin e publikuar në ceremoninë e së dielës.
