Klubet italiane të futbollit, Interi dhe Milani, po marrin masa kundër “tifozëve të padëshiruar” për edicionin e ri. Siç raporton gazeta italiane “Corriere della Sera”, klubet nga Milano ua kanë mohuar qindra tifozëve nga grupet ultras qasjen në biletat e reja sezonale.
Autoritet italiane i akuzojnë anëtarët e grupeve ultras nga të dyja klubet për shitje biletash në tregun e zi, zhvatje, trafikim droge, si dhe për lidhjen me mafinë kalabreze “Ndragheta”.
Sipas “Corriere della Sera”, klubet kanë marrë masa dhe kushdo që është nën hetim ose i përfshirë në incidente të dhunshme, do të cilësohet “tifoz i padëshiruar” dhe nuk do t’i lëshohet biletë sezonale, pavarësisht procedurave në vazhdim.
Emrat e grupeve “Curva Nord” të Interit dhe “Curva Sud” të Milanit, nuk do të shfaqen më në stadium.
Në stadium do të ketë koncept të ri sigurie për edicionin 2025/2026. Në hyrjet e stadiumit do të vendosen kamera identifikuese. Pilot-projekti mund të përfshihet edhe në stadiumet e tjera në Itali.