Lindon Emërllahu dhe Meriton Korenica janë prej futbollistëve më të mirë të Clujit rumun.
Pas paraqitjeve të mira që kanë pasur së fundmi me skuadrën nga kampionati elitar i Rumanisë, dy futbollistët e Kosovës kanë marrë vëmendje nga një klub i ligës MLS, ku luan edhe superylli i futbollit, Lionel Messi.
“ProSport” ka mësuar se për Emërllahun dhe Korenicën, interesim ka shprehur DC United.
Sipas mediumit rumun, ata janë mahnitur nga cilësitë e Korenicës.
“Zyrtarët e klubit të ligës MLS i pëlqejnë kualitetet fizike dhe teknike të 28-vjeçarit, të cilin e shohin si opsion për ta transferuar në afatin kalimtar dimëror”, ka shkruar “Prosport”.
Korenica u transferua te Cluji në verën e vitit të kaluar. Këtë sezon, futbollisti i Kosovës ka realizuar gjashtë gola dhe ka dhuruar shtatë asistime në 24 paraqitje për Clujin në të gjitha garant.
Nëse Korenica transferohet te DC United, Cluji mund të përfitojë shumë para.
Faqja “transfermarkt” që merret me statistikat dhe vlerën e lojtarëve në treg, e vlerëson Korenicën me 2.3 milionë euro.
Pronari i Clujit, Nelutu Varga, ka thënë se nuk është i informuar për një transferim të tillë.
“Sinqerisht, nuk e di. Jam në Dubai dhe nuk më është thënë për këtë asgjë”, ka deklaruar Nelutu Varga.
Ka folur ndërkohë edhe presidenti i Clujit, Iuliu Muresan.
“Emërllahu dhe Louis Munteanu ishin afër transferimit te FCSB-ja por shpresojmë që t’i shesim jashtë, të fitojmë para”, ka deklaruar ai.