Kampionia e Kosovës në futboll, Drita, ka pasur rezultate të luhatshme në shtatë xhirot e para të edicionit 2025/2026 të Superligës së Kosovës në futboll. Edhe më të vështirë e ka pasur Gjilani, që është i fundit me shtatë pikë. Një pikë më shumë në vendin e tetë është Drita, e cila ka dy fitore, dy barazime e tri humbje nga shtatë ndeshje. Gjilani ka dy fitore, një barazim e katër humbje.
Humbjen e fundit, Gjilani, e kishte ndaj Llapit. Me humbjen 4:1, Gjilani, largoi trajnerin Ardian Nuhiu, ndërsa derbin e xhiros së tetë të Superligës, do ta drejtojë trajneri i përkohshëm, Orhan Abdi.
Drita derbin e luan pas fitores ndaj Dukagjinit në Superligë dhe barazimit 1:1 ndaj KuPS-it në Ligën e Konferencës. Për Dritën ishte debutim në fazën e ligës në Ligën e Konferencës, garës së tretë të UEFA-s për nga rëndësia.
Derbi ndërmjet Gjilanit dhe Dritës luhet në fushën me bari artificial në Gjilan. Luhet nga ora 15:00.
Me derbin e qytetit të Gjilanit mbyllet edhe xhiroja e tetë e elitës së futbollit të Kosovës. Gjilani është vendës dhe rrjedhimisht do ta ketë edhe përkrahjen nga tribunat. Por trajneri i Dritës, Zekirija Ramadani thotë se lojtarët e tij janë të motivuar për ta fituar derbin ndaj Gjilanit.
“Ky takim është i vështirë, i lodhshëm, por ka shumë motiv. Nuk ka ndeshje të lehta gjithmonë ka ndeshje të vështira, sidomos kur është derbi, është dy herë më i vështirë. Por derbi luhet për t’u fituar. Ne e dimë punën tonë, edhe pa trajner të ishte ekipi i Gjilanit ne e dimë punën tonë, ne e kemi synimin tonë. Ne i marrim tre pikë dhe tifozët tanë deri në derbin e ardhshëm janë kryesues të qytetit”, ka thënë Ramadani.
Ramadani ka theksuar se derbit vendosen nga detajet.
“Më intereson lojë motivuese nuk më intereson lojë e bukur. Më intereson angazhim maksimal dhe që është me rëndësi objektivi janë pikët e plota”, është shprehur Ramadani.
Trajneri Ramadani ka respekt për trajnerin në detyrë të Gjilanit, Orhan Abdi. Por ai pret angazhim nga lojtarët e tij.
Edhe Jorgo Pëllumbi ka folur për rëndësinë e fitores në derbi.
Edhe
Gjilani mposht kampionen në derbin lokal
“Më duket sikur kam shumë kohë këtu, është një kampionat me shumë talente. Pak na vështirëson fusha, infrastruktura, por jam falënderues për pritjen”, theksoi Pëllumbi.
Ndërkohë, trajneri i përkohshëm i Gjilanit, Orhan Abdi, pret nga ekipi maksimumin.
“Jam i vetëdijshëm se çfarë na pret nesër, një derbi i jashtëzakonshëm në Kosovë. Pavarësisht se si ka qenë ecuria e skuadrës në këto shtatë ndeshje, derbi mes Gjilanit dhe Dritës është një lojë e veçantë për të gjithë Kosovën, sidomos për Gjilanin. E dimë rëndësinë e lojës, por duhet të jemi të fokusuar, jemi gati për ndeshjen e nesërme”, ka thënë Abdi.
