Ardhjet e vitit

“Rritja” e Kosovës është realizuar edhe falë futbollistëve që erdhën gjatë vitit 2025 dhe sollën më shumë cilësi në ekip.

Janë mesfushori, Leon Avdullahu, dhe mbrojtësi i qendrës, Albian Hajdari, që vlerësohen ardhje të vitit. Të dy lanë Zvicrën për t’iu bashkuar Kosovës.

Hajdari 22-vjeçar tashmë ka debutuar për Zvicrën. Por pasi nuk luajti ndeshje garuese, e kishte të drejtën e ndryshimit të përfaqësueses. E shfrytëzoi këtë të drejtë, duke sjellë stabilitet shtesë në mbrojtjen “dardane”.

Ai debutoi te Kosova më 10 tetor, në barazimin pa gola me Slloveninë në Prishtinë. I kompletoi edhe ndeshjet që Kosova i fitoi me Suedinë dhe me Slloveninë në udhëtim. Ndërkohë përzgjedhësi Franco Foda e pushoi nga ndeshja e fundit me Zvicrën, nga droja se do të ndëshkohej me karton të verdhë dhe kështu do të mbetej jashtë ndeshjes gjysmëfinale të plejofit.

Për arsye të njëjtë Foda e pushoi edhe mesfushorin Leon Avdullahu. 21-vjeçari luajti për të gjitha grupmoshat e Zvicrës dhe vlerësohej me potencial për ftesë te Zvicra A. Por vendosi për Kosovën.

Debutoi pikërisht ndaj Zvicrës, më 5 shtator në Basel, në humbjen 4:0 të Kosovës. Më pas kompletoi dy ndeshjet me Suedinë dhe dy të tjerat me Slloveninë. Avdullahu është i pazëvendësueshëm në mesfushë, bashkë me Elvis Rexhbeçajn, një tjetër ardhje cilësore, por e vitit 2024.

Ardhja gjatë vitit 2025 te Kosova dhe e kaluara te Zvicra nuk janë të përbashkëtat e vetme të Hajdarit e Avdullahut. Ata janë po ashtu në një skuadër – te Hoffenheimi i Bundesligës gjermane. Te kjo skuadër me shumë sukses luan edhe Fisnik Asllani, tashmë partner i Vedat Muriqit në sulmin e Kosovës. Asllani ka debutuar te Kosova në vitin 2024.

Ardhje tjetër e rëndësishme gjatë vitit 2025 te Kosova është ajo e Veldin Hoxhës, që ishte pjesë e të rinjve të Kroacisë. Ky mesfushor 23-vjeçar bën karrierë te Rubin Kazani në Rusi. Në hierarki të mesfushës është prapa Rexhbeçajt e Avdullahut, por vlerësohet i rëndësishëm për ekipin përfaqësues.