Trajneri portugez i Fenerbahçes, Jose Mourinho, ka thënë se “nuk mund të flasë” për gjyqtarët e ndeshjes me Lillen francez, pas eliminimit nga kualifikimet e Ligës së Kampionëve, pasi mund të dënohet.
Fenerbahçe të martën mbrëma barazoi 1:1 me Lillen e Edon Zhegrovës në kuadër të rrethit të tretë kualifikues të Championsit, por nuk mjaftoi për të avancuar tutje
Skuadra turke u eliminua me rezultatin e përgjithshëm, 3:2.
Mourinho ka theksuar se skuadra e tij tani mund të shkojë larg në Ligën e Evropës, nëse gjyqtarët janë korrekt në referim.
“Ne nuk do të mund ta fitonim Ligën e Kampionëve. Nuk do të mund asnjëherë ta arrinim finalen e Ligës së Kampionëve. Asnjëherë”, ka thënë Mourinho pas eliminimit.
“Por ne mund të shkojmë larg në Ligën e Evropës”, shtoi ai duke lënë të kuptohet se i duhet referimi i mirë për t’u arritur suksesi.
“Nëse doni të dini më shumë rreth kësaj, ju ftoj ta shikoni ndeshjen Roma – Sevilla në finalen e Ligës së Evropës 2022-23, dhe më pas do ta kuptoni”, ka shtuar Mourinho.
Mourinho u emërua trajner i Fenerbahçes në muajin qershor, pasi u shkarkua nga Roma në fillim të këtij viti.
