Motrat me pasion pianon

Sonata Hoxha ndjek paralelisht shkollën fillore “Ismail Qemaili” dhe shkollën e muzikës “Prenk Jakova”.

Ka një emër të veçantë dhe një dashuri të madhe për piano.

Ushtrimet e vazhdueshme e kanë bërë që të shpërblehet me shumë çmime në garat e ndryshme muzikore brenda dhe jashtë vendit. Së fundmi, ajo është shpërblyer me vendin e parë edhe në Bosnjë dhe për Sonatën ky është vetëm një inkurajim në rrugën e saj muzikore.

Certifikata të tjera me çmime në shtëpi u kanë sjellë edhe motrat e saj Luisa e Dua Hoxha. Luisa së fundmi është shpërblyer me vendin e tretë në “Valleta Piano Fest” të Maltës, ndërsa numëron edhe disa çmime të tjera nga garat e ndryshme muzikore.

Mësimet për piano, ato i ndjekin në shkollë te mësuesja dhe halla e tyre Pranvera Hoxha-Bryma, por që muzika ka qenë përherë e pranishme në shtëpinë e tyre.

Dua Hoxha vetëm 6-vjeçare mezi pret të fillojë shkollën, e cila edhe për të do të orientohet te muzika. Për Duan, që ndërvepron me shkathtësi me tastet e pianos, mjafton që ta dëgjojë një melodi që ta bartë atë në lojë. Por këngën e njohur “Mora Fjalë” i pëlqen ta luajë së bashku me babanë, i cili është po ashtu muzikant.

“Mallëngjimi” është një këngë e cila e bashkon muzikantin Fatos Hoxha së bashku me vajzat e reja muzikante, të cilat ëndrrat i kanë të lidhura me muzikën.

Tingujt e pianos janë një lundrim i përditshëm muzikor i motrave Hoxha. Ato e kanë në plan që në të ardhmen të bashkëpunojnë për të sjellë versione të veçanta të këngëve e veprave të njohura.