“Java e Albanologjisë” mbahet në tetor

Pesë sesionet e Institutit Albanologjik të Prishtinës i kanë bërë publike temat që do të diskutohen në edicionin e njëmbëdhjetë të “Javës së Albanologjisë”.

Kjo ngjarje e përvitshme ishte planifikuar të mbahej në fund të verës, por për shkak të pandemisë është shtyrë për në fund të tetorit, raporton KOHA.

Drejtori i Institutit Albanologjik të Prishtinës, Hysen Matoshi, thotë se konferencat e “Javës së Albanologjisë” duhet të mbahen në formë klasike, por me numër të reduktuar të pjesëmarrësve.

Sipas tij, shkaku i pandemisë interesimi për këtë aktivitet është më i vogël se vitet e kaluara.

Dega e Gjuhësisë sivjet do të debatojë për leksikologjinë. Ajo e Letërsisë do ta shtjellojë temën “Periodizimi i letërsisë shqipe”, ndërsa “Shqiptarët gjatë shekullit XIX” do të diskutohet në Sesionin e Historisë.

Edicioni i njëmbëdhjetë i “Javës së Albanologjisë” do të mbahet nga data 25 deri më 30 tetor.