Filarmonia në Gjakovë, me muzikë si ilaç për pandeminë

Pas pesë vjetëve, Filarmonia e Kosovës është rikthyer në qytetin e Gjakovës. Orkestra e Filarmonisë nën dirigjimin e Gridi Krajës nga Tirana, interpretoi një program me frymë shqiptare. Qyteti në jug-perëndim të Kosovës ishte lokacioni i radhës në kuadër të turneut, që ka nisur Filarmonia për ta shënuar 20-vjetorin e themelimit.

Dirigjenti, Kraja, i cili në këtë kohë pandemie, muzikën e konsideron ilaç, thotë se repertori ishte i ngjashëm me atë që orkestra e luajti në Prishtinë në tetor.

“Programi ishte pak a shumë ai që është luajtur në Prishtinë kuptohet me një tkurrje të vogël. E mira është që mos me qendru shumë gjatë pasi që jemi në një ambient të mbyllur dhe të mos rrezikojm njëri -tjetrin. Ishte një koncert shumë shumë i mirë i cili u prit shumë mirë në njërin nga qytetet më artdashës sic është Gjakova e që ka prodhuar edhe artistë prej të vërtetë. Jam ndarë shumë i kënaqur me nivelin e orkestrës dhe lojën e tyre”, ka thënë Gridi Kraja.

Në mesin e veprave shqipe që u luajtën ishte edhe uvertura nga opera “Goca e Kaçanikut” e Rauf Dhomit, “Valle shqiptare Nr.2” nga Thoma Gaqi, fragmente prej poemës simfonike “Skënderbeu”, si dhe vepra “Albanian Dance” nga kompozitori, Hajrullah Syla.

Publiku në sallë ishte i shpërndarë, njëlloj siç ishin edhe anëtarët e Orkestrës në skenë. Distanca ishte diçka me të cilën kanë nisur të mësohen dy palët. Mbajtja e maskave ishte po ashtu obligative.

Megjithatë, interesimi i publikut nuk është zbehur.

“Ishim shumë të befasuar me numrin dhe me interesimin e madh të publikut këtu në gjakovë./ Për fat të mirë salla i ka mbi 700 ulëse dhe natyrisht respektohen të gjitha masat anti-kovid që po kërkohen që kërkohen për manifestime të tilla”, ka thënë Baki Jashari.

Për ata që ndoqën koncertin, dalja e Filarmonisë nga kryeqyteti është për t’u lavdëruar.

Pas paraqitjes në Prishtinë, Pejë, Gjakovë e Shkup, Filarmonia do të prezantohet edhe jashtë kufijve. Destinacion të radhës e ka përsëri Shkupin, pastaj Tetovën dhe Shqipërinë.